Хорлам бизники болуруна ийнаннганды

Совет къыралгъа немис фашистле билдирмей чабыууллукъ этген къанлы урушдан бери жылла да, тарыхда да кёп зат тюрлене келе эсе да, биз ол къазауатха къатышханларыбызны, тюзлюк эмда мамырлыкъ ючюн жан бергенлерибизни бир заманда да унутурукъ тюйюлбюз. Ала хар бири да бизни эсибизде, жюреклерибизде да жигитле болгъанлай къаллыкъдыла.

Уллу эмда огъурлу юйюрде туугъан Мисирланы Мухамметни да жыл саныны алыкъа жашлыгъына да къарамай, эртте юйдегили этген эдиле. Темиржанланы къызлары Сакинат бла бирге насыпларына къууана, алагъа жашчыкъ да къошулады. Алай эсе да, жангыдан къуралгъан ариу юйюрню насыбы узакъгъа уа бармады.

Аскерге  чакъырылгъынчы, Мисир улу Огъары Малкъарны (анда уа ала Саутуда тургъандыла) колхозунда тамата учётчик болгъанды. 1940 жылны июнунда уа аны Ата журтну аллында борчун толтурургъа чакъырадыла. Къызыл Аскерни тизгинлеринде къуллугъун а ол Сайрала атлы станцияны Карельский перешеек деген тийресинде башлагъанды.

Эки ай да тамам озгъунчу, аны Кюнбатыш Белоруссиягъа  кёчюредиле. Анда Брест областьны Барановичи районуна тюшеди. Ызы бла Клецк шахарда аскер училищеге ашырадыла. Мисир улу аны уруш башланырны аллында лейтенант чында тауусады. Алай бла уа пулемёт взводну 786-чы мараучу бёлюмюню командири болады.

Къанлы къазауат башланнган биринчи кюнден окъуна сагъынылгъан бёлюм кюйсюз душман бла къаты сермешге кирген эди. Урушууларын тохтатмай, ала Клецкден къыралны теренине кетедиле. 1941 жылны октябрь айыны аллында 16-чы армияны къурамында, анга уа генерал-лейтенант Константин Рокоссовский башчылыкъ этгенди, Москваны тийресине жетедиле.

Фронтну Волоколамск участогунда энди тамата лейтенант, пулемёт взводну къазауатха элте, къыралыбызны ара шахары ючюн баргъан къыйын сермешледен биринде жан бергенди. Ол Ата журтну жигитча къоруулай жоюлгъаныны юсюнден къара къагъытны уа кеси да ол заманда урушха тири къатышхан кичи къарындашы Зубей ноябрьде алгъанды.

Тамата къарындашларын  алай къысха заманны ичинде тас этгенлери уллу юйюрге ёмюрлюк ачыу болгъан эди. Алай а жарсыу аны бла тауусулуп да къалмагъанды.

1942 жылда Малкъар ауузда болгъан бушуулу ишледе – Саутунуу къыргъанларында – аланы аталары Тетаны, эгечлери Арзиятны,  келинчиклери Сакинатны, Мухамметни жашчыгъы 4-5-жыллыкъ Абусаламны да жойгъандыла.

Алай эсе уа, къалгъанлары Хадижат, Айшат, Фатимат, Зубей, Харун урушда жан берген къарындашларын бир заманда да унутмагъандыла. Ёсюп келген жангы тёлюге да аны жигитлигини, ариулугъуну эмда огъурлулугъуну юсюнден хапарлагъанлай тургъандыла. Бюгюнлюкде аланы къайсы бирини да юйлеринде туудукълары Мисир улуну суратларын окъуна ийнакълап жюрютедиле. Аны башхача хурметлейдиле.

Немис фашистле бла къанлы урушда болдургъан батырлыкълары ючюн а тамата лейтенант Мисирланы Тетаны жашы Мухаммет «Къызыл Жулдузну ордени», Ата журт урушну экинчи даражалы ордени, Александр Невскийни ордени эмда майдалла бла саугъаланнганды. Таулу жаш тюзлюк хорларына ийнаннганлай, ол ийнанмакълыгъын ахыр солуууна дери жюрегинде тутханды. Юч жыл мындан алгъа уа къарындашларындан туугъан жашла, аны документлерин жыйышдырып, Москвада онлайн халда бардырылгъан «Ёлюмсюз полк» акциягъа да жиберген эдиле.

Жылла, кюнле да оза, ёмюрлюкге кетселе да,  ала ётгюр, ёхтем жашларыбыз бла къызларыбыз этген жигитликлени бизни эсибизден кетераллыкъ тюйюлдюле. Уруш къыйынлыкъны кёрген тёлю бизге хар заманда да Ата журтха, тыпыр ташха сюймекликни, тюзлюкге ийнанмакълыкъны эмда ёлчемсиз кишиликни юлгюсю болгъанлай къаллыкъдыла.