Шыкъыда – тукъум белгиле

Талай жыл мындан алгъа поэт Гуртуланы Салихни башчылыгъында къауум адам Холамда эртте заманлада жашагъан тукъумланы атлары бла эсгертме ташны сюерге оноу этип, ары барып, ол жумушну тындырадыла. Бусагъатда алайда бир ненча ашханала ачылып, табийгъатны ариулугъун кёрюрге, бурун заманлада адамла жашагъан жерлени жокъларгъа кёпле келедиле. Алай бла солуу жерле, турист жолла да ачыладыла.

Бу кюнледе уа  аллай мермер ташны Шыкъыда ол элденбиз деген жашла да орнатхандыла. Ол эсгертме  Мечиланы Кязимни гюрбежисини къатында  тёшню башында талачыкъда сюеледи. Аны юсюнде Шыкъыны тарыхыны юсюнден жазыула, Айшаланы, Аналаны, Гайыланы, Додуланы, Къазийланы, Кючменланы,  Мечиланы, Солтанланы, Сюйдюмланы, Уяналаны, Хочуланы, Хусейналаны (Эфендилары), Шауаланы тукъумлары жазылыпдыла, тукъум тамгъалары да салыныпдыла. 

Ташны ишлетиуге, орнатыугъа да Гайыланы Алик, Шауаладан Мурадин, Аслан, Рамазан,  Орусбий, Солтанланы Хаким да юлюшлерин къошхандыла.

- Бу эсгертме келир тёлюлеге тарых магъанасы болур деп ышанабыз. Нек дегенде  ата-бабаларыбыз жашагъан элди. Андан сора да, хар тукъумну юйлерини хуналары сакъланнгандыла. Таматала ала  кимни юйю  къалайда болгъанын кёргюзтгендиле. Белгилени да анга кёре орнатханбыз. Жыл сайын Кязимни юйюн, гюрбежисин да кёре кёп адам келеди, аланы араларында уа шыкъычыла да бардыла, ала  буруннгулу эллерин кёрселе, ата-бабаларыны юйлерин жокъласала, хычыуун кёрюнюр.

Дагъыда келир заманлада бу тийреге  туристле бютюн кёп келе башларла, кеси да  республикабызны туризм бла байламлы эм айбат жерлеринден бирине  айланыр деп да ышанабыз,- дегенди Гайыланы Мажитни жашы Алик.