«Кючлю профсоюзла – тутхучлу къырал»

4 мая, 2025 - 09:00

Биринчи май кёп жылланы ичинде бизни къыралда урунуу бирликни белгиси болуп келеди. Россейде ол эркин этилмеген маёвкаладан башлап, халкъ байрамгъа айланнганды. Кертисин айтханда, совет заманда  бир  кезиуледе анга  аты-саны  болсун деп, алай къаралгъан эди. Бюгюнлюкде уа  профсоюзла не магъананы тутадыла? Аны юсюнденди бизни  «КъМР-ни профсоюз биригиулерини» союзуну таматасы, КъМР-ни Парламентини депутаты Фатима Амшокова бла ушагъыбыз.

– Фатима Каралбиевна, бюгюнлюкде профсоюзлагъа  ал кезиуде магъаналарын къайтарыргъа къолдан келгенмиди?

– Биринчи май – ол къыралны профсоюзлары миллионла бла уруннганланы  бирикдирген кюндю. Жамауат иш хакъ адамны уруннганына кёре болургъа, ишлерге сюйгенле ишчи жерле  бла жалчытылырларын, социал  гарантияла берилирлерин ачыкъ излеген  кезиудю. 
– Алай болур ючюн профсоюзла уа не мадарла этедиле?
-Россейни профсоюзларыны жалынчакъсыз федерациясыны  онекинчи съезди  «Информация, агитация, пропаганда – профсоюзланы айнытыр ючюн» деген  резолюцияны къабыл кёргенди. Ма анда  профсоюзлагъа кирген  организацияланы барысына да  борч салыннганды: «Ишлеген адамгъа иш хакъны  тюзлюк бла тёлерге, урунуугъа бла урунуу коллективге жууаплы кёзден къараргъа, аланы багъаларгъа, сайланнган усталыкъны адам  багъалай билирча этерге. 
– Социал партнёрство  жашауда къалай бардырылгъанын да айтсагъыз эди.
– Россей Федерацияны Конституциясында  социал партнёрлукъну  жалчытыргъа  кереклисини юсюнден энчи болум барды. Болсада урунууну юсюнден айтханда, ол тийишлисича ишлемейди. Иш бериучюлени бир-бирлери социал партнёрлукъгъа къатышыргъа унамагъанлары ючюн  ишлегенлени  иги кесеги  коллектив келишимле этмей, социал жаны бла къорууланмай къаладыла. Андан сора да, сёз ючюн, урунууну  бир-бир формаларына кёре, ишлегенлени араларында  социал партнёрлукъну амалы  жюрюмейди. Нек дегенде  аны ючюн деп, энчи жорукъла жарашдырылмагъандыла. 
– Биринчи майны  къалай ётдюрюрге дейсиз?
– Профсоюз къымылдауну тёрелерине кертичи болуп, бек башы – уруннган адамланы эркинликлерин бла сейирлерин къорууларыкъбыз. ФНПР-ни толтуруучу комитети быйыл 21 апрельден 1 майгъа дери профсоюзланы акцияларын бардырыргъа деп бегим чыгъаргъанды. Акцияны мураты - жамауатны бла власть органланы эслерин уруннган адамны  излемлерине, къыралны  айныу онгларына бурууду. 
– Быйыл  биринчи майны  акциясы  «Жигер урунуу – Хорламны  ёзегиди!». Профсоюзланы баш чакъырыулары да тохташдырылгъандыла: 
– Кючлю профсоюзла-тутхучлу къырал! 
  – Бизни кючбюз-бирликдеди эмда бир ниетлиликдеди!
– Санкциялагъа бизни жууабыбыз – экономикабызны  айнытыу!
– Ишлеген адам  жарлы болмазгъа керекди!
– Коллектив келишим – ишчини  къоруулау кючюдю!
– Кючлю россейли экономика – Хорламны эмда Ата журтубузну къорукъуусузлугъуну мурдоруду!
ФНПР-ни толтуруучу комитетини «2025 жылда Профсоюзланы биринчи май акцияларын бардырыуну юсюнден оноуун  толтурур мурат бла КъМР-ни Профсоюзларыны федерациясыны президиуму 21 мартда болгъан жыйылыуунда 1 майны акцияларыны чеклеринде бардырыллыкъ ишлени баш формаларын тохташдыргъанды: митинг- концерт эмда маёвка. 
Биринчи майны акцияларын кереклисича бардырыр ючюн, биз биринчи профсоюз организациялагъа аланы юслеринден жорукъла жибергенбиз.  Ала  бла бирге республикада профсоюз къымылдауну юсюнден тарых материалла бла жалчытханбыз,   КъМР-ни Профсоюзларыны федерациясы миллет муратлагъа жетер ючюн  не зат этерге кереклисин да  белгилегенбиз.   
Биринчи майны акцияларына кёре, профсоюзла не ишле тындырлыкъларыны юсюнден  асламлы информация органлада билдирилгенлей турлукъду. 
Ушакъны Холаланы Марзият бардыргъанды.
  • 28 просмотров
Поделиться: