Фахмулары – сахнада

3 мая, 2025 - 10:00

Озгъан ыйыкъда Элбрус районну маданият жашаууну магъаналы  байрамлары ётгенди. Хар элни маданият юйюнде къошакъ билим алгъанлагъа, искусство жаны бла сабийлени сау жылны ичинде неге юйреннгенлерине управленияны келечилеринден къуралгъан комиссия къарагъанды, тийишли багъа бергенди.     

Биринчи аллай уллу байрам Кёнделен элни маданият юйюнде ачылгъанды. Бу эл не жаны бла да фахмуланы гюрбежиси болгъанын эсге алсакъ, аладан излемибиз да уллу болады. Хар къараучуну ыразы  эталгъандыла кёнделенчиле. Жырда, сахна оюнда, тепсеуледе  сабийлени хунерлери   жылны ичинде иги да айныгъаны бла ёсгени белгили эди. Жарыкъ байрам андан ары Лашкутада бардырылгъанды. Эришиуню чеклеринде лашкутачыла да фахмуларын айнытыуда бла хунерлерин ёсдюрюуде  артха къалмагъанларын кёргюзтгендиле. Тизгинлери ариу жыйылгъан къызчыкъла бла жашчыкъла назмуланы  шатык окъуп, жырланы аламат айтып, къонакъланы кёллерин жарыталгъандыла. Сахна оюнну кезиуюнде сабийлени ана тиллеринде алай иги сёлеше билгенлерин энчи черте, аланы юйюрлерине, аталарына  бла аналарына, школда окъутхан ана тилден устазларына да ыспас этерге тийишлиди. 
Андан ары байрам кезиу Быллымны маданият юйюне кёчгенди. Мында эрттеден къуралгъан тепсеу къауум жылны ичине юйреннген жангы тепсеулери бла жыйылгъанланы кёллерине жетгендиле. Бу элни фахмулу сабийлери кёпдюле, аланы къол усталыкъларына да къарап сукъланырчады. Маданият юйню кесинде бир ненча биригиуде сабийлени фахмуларын айнытыр онглары барды. Ала, сахнаны зынгырдата, жырладыла, тепседиле, ойнадыла. Ол ингирни бек магъаналы кесеги уа къонакъбайлыкъ болгъанды. Алгъаракълада билдиргенибизча, «Къонакъбайлыкъ-2025» деген аламат проектни чеклеринде Быллымда жашагъан Жанатайланы Зауурну юйюрю Чегем шахардан Мухарбек Мзоковну юйлеринде къонакъ этгендиле. Аны да маданият юйге чакъырып, сыйлы саугъала бла къууандыргъандыла. Концерт бошалгъандан сора, къонакъла хычинни байрамына тюшгендиле. Быллымны школуну 5-8-чи классларыны окъуучуларыны араларында тёрт номинациягъа кёре эришгендиле. Къалгъанланы уа аламат таулу хантла бла сыйланыр онглары болгъанды. Алай бла эллилени, къонакъланы да эслеринде къалырча къууанч къуралгъанды. 
Элбрус элни жангы ачылгъан маданият юйюнде да ётгенди къууанч. Анда халкъла аралы фестивальда хорлап, кёп болмай къайтхан «Эльбрус» миллет тепсеулени юлгюлю ансамбли, сахнада от чакъдыра, къараучулагъа зауукълукъ келтиргендиле. 
Элбрус районну маданият управлениясыны халкъ чыгъармачылыкъны арасына да къайтып, комиссияны келечилерини Огъары Басханны сабийлерини къол усталыкълары бла да шагъырейленир онглары болгъанды. Кертиси бла да, зауукълу ыйыкъ ётдюргендиле ала. Дуния башында сабийни жетишимине бла фахмусуна къууаннгандан уллу зауукълугъ а  къайда. 
Бу эришиу халда бардырылгъан къараула Тырныауузну Къулийланы Къайсын атлы маданият юйюнде бардырылгъан отчёт концерт бла бошалгъанды. Анда музыка, вокал эм тюрлю-тюрлю тепсеуле бла кюрешген жаш тёлю  ингирни къонакъларына бла ата-аналарына фахмуларын кёргюзтгендиле. Ол бёлюмлени  къызларына бла жашларына окъууну бошагъанларына шагъатлыкъ этген къагъытларын да къууанчлы халда бергендиле. Бёлюмлени таматаларын да  саугъалап, къыйынларына тийишли багъа бичгендиле, сый бере, аланы махтау къагъытла бла саугъалагъандыла. 
Темуккуланы Асият.
  • 45 просмотров
Поделиться: