«Ишигизни магъаналылыгъын ёнчелеп чыгъаргъа онг жокъду»

КъМР-ни Башчысы Казбек Коков жер-жерли самоуправление органлада ишлегенлени профессионал байрамлары бла алгъышлагъанды. 

«Властьны адамлагъа бек жууукъ болгъан кесегини - жер-жерли самоуправленияны - магъаналылыгъын ёнчелеп чыгъаргъа онг жокъду. Къыралгъа ышаныулукъ, инсанланы социал ырахатлыкълары, аланы тамблагъа таукел атламлары ма сизни ишигизге кёре боладыла. Республиканы жамауаты жарсыулары эмда тилеклери бла бек алгъа сизге келедиле, аланы толтурурсуз, кемчиликлени кетерирсиз деп,  сизден сакълайдыла. 

Бюгюнлюкде сизге миллет проектлени, регион эмда муниципал программаланы жашауда бардырыу бла байламлы кёп тюрлю борчланы тамамларгъа тюшеди. Ала уа, белгилисича, жер-жерлени социал эмда экономика болумларын игилендириуге, къолайлыкъларын ёсдюрюуге, ырахат жашау къураугъа бурулупдула. Энчи аскер операциягъа къатышханлагъа бла аланы юйюрлерине тутхучлулукъ этиу жаны бла  бардыргъан ишигиз ючюн а сизге энчи ыспас этерчады.

Бийик усталыгъыгъыз, жерлешлеригизни жашауларын къолайлы да, тынчлыкълы да этерге итиниуюгюз сизге боюнугъузгъа салыннган магъаналы да, жууаплы да борчларыгъызны бет жарыкъла тамамларгъа себеплик этериклерине ишексизме.

Сизге кийик саулукъ, жетишимле, жюрек ырахатлыкъ тежейме! Бар игиликле да сизни болсунла!»,- деп айтылады  республиканы Башчысыны алгъышлау сёзюнде.