РЕПЕТИТОР

 Чам

Бизни штатда болмагъан корреспондентибиз Кючмезланы Айза кесини жашауунда болгъан бир чам хапарчыгъын жазып ашыргъанды да, бюгюн сизни аны бла шагъырей этерге сюебиз.

Биз юйюрюбюз бла бир кезиуде шахарда жашагъанбыз. Тамата къарындашым бла бирге, юйден узакъ болмай сабий садха жюрюй эдик. Аны бирси сабий садладан башхалыгъы болмаз эди, алай гитче таулу къызчыкъны эсинде аны бир энчилиги къалгъанды: 25 сабийден менден сора къауумубузда бир таулу къызчыкъ бар эди. Алай ол орусча болмаса, тауча сёз да билмей эди. Ол энчилик бла байламлы, мени башыма жашауумда биринчи бизнес-планым келди.

  Ишни кёпге соза турмай, мен: - Сен таулу болгъанлыкъгъа, тауча билмейсе. Малкъар тилге юйренирге сюемисе?, - деп, башха сабийле юзмез тёбечикде кеслерин булжута тургъунчу, манга биринчи клиент боллукъну къолгъа алдым.

- Малкъар тилге?, - деп сорду сарычач къызчыкъ.

- Сен жаланда орус тилни билесе. Алай менича, малкъар тилде сёлеширге юйренсенг, бизни къарт ыннала санга да саугъала, конфетле бере турлукъдула. Сюемисе? - деп, мен «иш кёллю» сёзле бла аны сакъларыкъ ахшылыкъланы ангылатып башладым.

Мени кёп файда келтирлик хапарымы эшитгенлей, къызчыкъ: «Сюеме», – деп жууаплады.

- Сора, мен сени юйретип башлайма, - деп, устазлыкъ борчну арсарсыз алдым. - Алай, сен манга конфетле келтирип турлукъса. Мен шоколад конфетлени сюеме, ичлеринде къатхан жюзюмю, шапталы болгъанланы уа жаратмайма. Бек сюйгенлерим «Степ», «Метеоритный дождь», «Баунти»…

- Мен аланы къайдан табып келтирликме? - деп, «клиентим» мени дерслерими хакъын къайда мажарлыгъыны юсюнден сагъышха къалды.

- Анангдан тилерге, неда юйюнгден алып келирге боллукъса, - дедим мен. Алай бла, аны эки инбашына мёлекни бла шайтанчыкъны олтуртуп, конфетлени мадарыр жолланы арасында сайлауну кесине къойдум.

Дерс берип мен экинчи кюн окъуна башладым. Бизни группабыз арбазгъа ойнаргъа чыкъгъанлай, мен «сохтамы» окъутууну къолгъа алдым.

- «Огурец» тауча къалай боллукъду? - деп, къызчыкъ, биз тюшде ашагъан азыкъланы эсине тюшюрюп, санап башлады.

- «Наша», - деп, кёп сагъыш этмей, жууап бердим.

- Конфетле уа?

- Кампетле… Мен кесим шахарда ёсгеним себепли, тауча артыкъ уста билмей, ол себепден, кёп сёзлени терс ангылатыргъа да бола эдим. Алай, ол заманлада «интернет» башха «устазла» аз болмагъанланы себепли, тилге юйрениуню жорукълары мени къолумда суна эдим.

Бир ненча кюнден клиентиме башха сохтала да къошулдула. Аланы бир къаууму дерслерими багъасын заманында тёлеялмагъанлары себепли, манга жангы амалла излерге тюшдю.

- Ма быллайладан быллай бир,- деп, мен бармакъларымы жайып, окъуучуларыма чапыракъланы кёргюзтеме. Чапыракъла бизни оюнларыбызда ахча орунуна жюрюй башлайдыла. Аны хайыры бла, тюшден сора ойнаргъа чыкъгъан заманыбызны оноучусу болдум.

Къаллай зауукъ заман эди: конкурентле жокъ неда «дерслериме» багъа бичерикле. «Сохталарымы» санлары ёсе баргъаны сайын, сабий садда деберим, сыйым да кётюрюле башлайды. «Ёнкючлерин» заманында тёлеялмагъанлагъа уа кесим этерге сюймеучю жумушланы этдире эдим. Сёз ючюн, ала мени орунума эслетмей, сют иче эдиле, неда солуучу отоудан мен сюйген илляуну келтире эдиле. Ол бир жангы ёмюрню башланнган заманы эди…

Алай, ол зауукълу кезиу, къалай эсе да, мен да, «клиентлерим» да сакъламай тургъанлай бошалып къалды: школгъа барыр заманыбыз жетди...