Къарындашланы къыйын къадарлары

Хорламны 80-жыллыгъына

Уллу Ата журт уруш башланнганда, Тёбен Чегем элде жашагъан Таппасханланы Къубадий немисли фашистле бла къазауатха 3 жашын ашыргъан эди. Исхакъ, Жабай эм Къубай, башха таулу жашлача, туугъан жерлерине, сюйген тауларына ууучлаучула жетмез ючюн жанларын-къанларын аямай урушхандыла.

Исхакъ бла Жабай 115-чи атлы  дивизиягъа тюшген эдиле. Белгилисича, 1942 жылны жай айларында бизникиле Ростов областьны Уллу Мартыновка элини тийресинде кюйсюз урушха киришген эдиле. Анда  атлы эм жаяу аскерчилеге фашистлени танкларына къылычла бла къажау сюелирге тюшген эди.

Ол къызыу сермешлеге къатышып, сау къалгъанларын немислиле жесирге алып, Германиягъа сюрген эдиле. Аланы араларында Исхакъ бла ауур жаралы болгъан Жабай да бар эдиле. Алай бла ала экиси да Мюльберг шахардагъы концлагерьге тюшедиле. Ары жетгинчи жолда хушто сыртчыла Бечелланы Оразай бла Мызыланы Мухажир къачаргъа дейдиле. Алай Исхакъ жаралы къарындашын къоюп кеталмагъанын  артда аны эгечлерине  айтхан эдиле.

Жабай а жолда ёледи. Нек дегенде концлагерьге тюшгенлени тизмесинде аны аты жокъду. Исхакъ а фашистлени къолларындан 1942 жылда 13 декабрьде жоюлгъанды. Аны ёлюгю Цайнтхайнедеги концлагерьде болгъан къарындаш къабырдады. Ол шартны Исхакъны туудукълары излей кетип  2012 жылда тохташдыргъандыла.

Аланы ючюнчю жашлары Къубайны юсюнден а бир тюрлю хапар  жокъду.

Урушха дери, 30-чу жыллада, Исхакъ совхозну жылкъычысы, жер-жерли советни депутаты эди. 1936 жылда ВДНХ-да кёрмючге да къатышханды. 

Исхакъны эгечи Зариятны эсгериулерине кёре, Ленинни орденин берир ючюн элге комиссияны сакълай эдиле. Аны алыр ючюн, ол алагъа бир атдан эки тай алама дерге керек эди. Алай Исхакъ ётюрюк айтыргъа сюймей тохтайды да, орденни башхагъа бередиле.