Ново-Ивановкагъа – 140 жыл

Май районда Ново-Ивановское элни 140 жыллыгъын анда Маданият юйюнде уллу байрам бардырып белгилегендиле. Къууанчлы жыйылыуну Шура Козуб атлы лицейни гитче классларыны окъуучулары ачхандыла. Сабийле элни юбилейин жулдуз жыйын бла тенглешдирип, анда хар бири да ёз жерини тарых магъаналы шартларын эмда аны айныууна уллу къыйын салгъан инсанланы кёргюзтгенин чертгендиле.

Ызы бла элни башчысыны къуллугъун толтургъан Александр Емцев жыйылгъанлагъа алгъышлау сёзюн айтханды. Аланы санында уа Май районну башчысы Татьяна Саенко, «Ленинцы» мюлкню башчысы, КъМР-ни Парламентини депутаты Владислав Русс, дин къуллукъчула эм башхала  бар эдиле. Александр Емцев элни адамларына, айырмалы урунуп, ёз жерлерине кертичи болуп, аны атын иги бла айтдыргъанлагъа жюрегинден ыразылыгъын билдиргенди.

Ново-Ивановское элни тарыхы 1885 жылда башланады. Ол кезиуде алайгъа Полтава губерниядан 60 юйюр кёчюрюлген эди. Элни биринчи аты Цугулиевка деп болгъанды, ол жер сатып алыннган бийини тукъумуна кёре. Ызы бла уа, анда Иоанн Предтеча атлы килиса ишленнгенден сора, Ново-Ивановкагъа тюрлендирилгенди.

Заман баргъан кезиуде элде жангы учрежденияла ачылып башланнгандыла: 1892 жылда юч класслы килиса школ къуралгъанды, 1920 жыллада уа китапхана, фельдшер-акушер пункт, почтаны бёлюмю ишлеп тебирегендиле. Ол заманда анда биринчи эл мюлк биригиуле чыкъгъан эдиле; ызы бла барын да бирге къошуп, «Ленинцы» колхозну къурагъандыла.

Уллу Ата журт урушну кезиую элни тарыхында магъаналы жерни алады. Фронтха андан алты жюзден артыкъ адам кетгенди. Ачы сермешле Ново-Ивановскоени ичинде да баргъандыла. Душман аны юч кере кюрешгенди бийлерге, алай хар кере да, адамланы жигитликлерини хайырындан, ол аланы къолларындан келмей къалгъанды. Элден бир ненча адам орденле эмда майдалла бла саугъаланнгандыла.

Уруш бошалгъандан сора эл жангыртылып, айнып башлагъанды. Алтмышынчы жыллада аны ара жеринде Ата журт ючюн жанларын бергенлеге эсгертме орнатхандыла, «Ленинцы» колхоз а жангы школ ишлегенди. Ызы бла анда бир ненча социал объект, сабий садик, больница, жашау журтла да сюегендиле.

Бюгюнлюкде Ново-Ивановское элде юч мингден артыкъ адам жашайды. Аланы ичинде кёп миллетлени адамлары бардыла. Элде лицей, сабий садик, амбулатория, Маданият юй, китапхана, сабий музыка школ, почта эм башха организацияла да ишлейдиле.

Байрам жыйылыуда энчи аскер операциягъа къатышханлагъа, урунууну ветеранларына, педагоглагъа, саулукъ сакълауну эмда культураны ишчилерине энчи эс бургъандыла. Элни айныууна къатышхан жаш юйюрлеге, сабийлеге да хурмет этгендиле. Къонакъланы алларына чыгъып, талай чыгъармачылыкъ къауум жырла айтып, тепсеп кёллерин кётюргендиле.