Жаш жырчыланы жетишимлери

Кёп болмай Нальчикде, Къулийланы Къайсын атлы Малкъар къырал  драма театрда Дуния артии комитет  бла Россейни Артиадасы къурап  «Нальчик-насыпны налы» деген 11-чи халкъла аралы эришиу болгъанды.

Аны баш мураты фахмулу жаш тёлюню ачыкълау эм анга не  жаны бла болушлукъ этиудю. Къырал эм халкъла аралы биригиулени эслерин сабийлени эм жаш тёлюню фахмуларына бла чыгъармачылыкъларына  бурууду. Дагъыда, халкъланы араларында байламлыкъны кючлеу, фахмулу сабийлени бири бирлери бла шуёхлукъ къурау.

Бу мурат бла эришиуню къураучула фахмулу сабийлени бла жаш тёлюню устазларыны профессионал даражаларын ёсдюре, семинарла бла тёгерек столла бардырадыла. Эришиуню сейирлерин бла муратларын жашауда бардырыр ючюн, керекли амалланы сюзедиле.

Элбрус районну Къулийланы Къайсын атлы маданият юйюню «Сопрано плюс» вокал креатив студиясыны сохталарыда  бу эришиуге  жетишимли къатышхандыла. Студияны таматасы Гузиланы Дженнет а быйылдан башлап жюрини къауумуну вокалгъа къарагъан келечиси болгъанды. 

«Сопрано плюс» студияны фахмулу жырчылары эришиуге бек жууаплы хазырланнгандыла. Анга кёре эсеплери да бийикдиле.

- Мени оюмума кёре, быллай конкурсланы уллу магъанасы барды. Кёп халкъланы бла къыралланы маданиятлары бла шагъырейлениу сабийлени бла жаш тёлюню билимлерин айнытады. Бир бири араларында байламлыкъны  бла шуёхлукъну  жаратылыуу да махтаулуду, - дейди Дженнет Рамазановна.

«Сопрано плюс» студиябызны сохталары фахмулары бла кёплени кёллерине жеталгъандыла. Къалабекланы Тимур эм гитчечиклени араларында алчы болгъанды. «Сенгирчге кырдыкда олтурады» деген жыры бла къараучулагъа кесин сюйдюралгъанды. Анга жаланда 5 жыл бола эсе да, халкъла аралы эришиуню дебютанты болалгъанды. Гызыланы Айла 7-9 -жыллыкъланы араларында биринчи жерге тийишли болгъанды. «Ол муратды»деген жырны айтханды. Сельми Махмудова серб тилде «Dzayum» деген бек ариу жырны айтханды.Ол Черкесланы Айла бла бирге 13-15-жыллыкъланы араларында 1-чи жерни алгъанды.  Гаджиева Диана уа «Матушка земля» деген жыр бла къараучуланы кёллерин алалгъанды. Ол 16-18- жыллыкъланы араларында эришиуню алтын майдалына тийишли болгъанды.

 Быллай даражада бардырылгъан эришиуледе махтаулу жерлеге тийишли болуу бизни жаш жырчыларыбызны бла аланы педагогларыны бийик профессионал атламлары болгъанында  энчи белгилерчады.