Жаш адамланы къайгъысын кёрюп

КъМР-де Ич ишле министерствону акъылбалыкъ болмагъанланы ишлери жаны бла инспекторлары профильли смена къурагъандыла. Ол «Биринчилени атламлары» биригиуню болушлугъу бла къуралгъанды.

Смена сабийлени чыгъармачылыкъгъа, спортха, илмугъа фахмуларын ачыкълар, аланы социал магъаналы жумушлагъа кёллендирир мурат бла къуралгъанды.  Ол Энейланы Тимурну атын жюрютген «Антарес» регион арада бардырылгъанды, бу жумушлагъа къыйын жашау болумгъа тюшген жашла бла къызла къатышхандыла – битеу да бирге жюзге жууукъ. 

Ала бла сурат ишлерге, тепсерге, адамланы аллында сёлеширге, ушакъла бардырыргъа бурулгъан юйрениуле къуралгъандыла. Алай бла жашла бла къызла бирге ишлерге юйреннгендиле. Школда тенглерини сыйларын тюшюрюу, ачытыу (буллинг) ишлени болдурмаугъа бурулгъан оюн, башха дерсле да бардырылгъандыла. Жашла бла къызла энчи аскер операцияны ветеранлары эмда «Биринчилени атламлары» биригиуню  регион бёлюмюню таматасы  бла да тюбешгендиле. 

Смена бошалгъандан сора, анга къатышхан жашладан бири, кесини ыразылыгъын айтып, былай жазгъанды: «Быллай жумушну къурагъанлагъа жюрегимден ыспас этеме. Жети кюнню ичинде мен тюрленнгенме, сиз болмасагъыз, алышынырыкъ болмаз эдим».