Аманлыкъчылыкъдан тыйыуну мадарларын сюзгендиле

Акъылбалыкъ болмагъанла этген право бузукълукъланы соруулары ведомствола аралы «тёгерек столда» сюзюлгендиле. Тюбешиу Россейни Ич ишле министерствосунда акъылбалыкъ болмагъанланы ишлери жаны бла бёлюм эмда акъылбалыкъ болмагъанла бузукълукъла этгенлери ючюн болжаллы халда тутулгъан ара къуралгъанлы 90 жыл толгъанына аталгъанды.

КъМР-де МВД-ны полицияны участка уполномоченныйлерини ишлерин къурау эм акъылбалыкъ болмагъанланы ишлери жаны бла бёлюмюню къуллукъчулары Россейни МВД-сыны Краснодарда университетини Шимал Кавказда квалификацияны ёсдюрюу жаны бла институтунда ведомствола аралы «тёгерек стол» къурагъандыла.

Анда акъылбалыкъ болмагъанланы арасында право бузукълукъланы тохтатыу, ала ёсген юйюрлени болумларын тинтиу, сабийле юйлеринден къачып, орамлада кеслери алларына айланнганларын тохтатыу жаны бла магъаналы соруулагъа къаралгъанды. Акъылбалыкъ болмагъанла асламында этген аманлыкъланы эмда аланы тохтатыугъа бурулгъан мадарланы да сюзгендиле. Профилактиканы хайырлылыгъыны сорууларыны юслеринден айта, бу сорууда юйюрню магъанасын да белгилегендиле.

Вузну башчысыны къуллугъун толтургъан Вадим Колиев институтну устазлары право низамны сакълаучулагъа бу соруулада методика болушлукъ этерге хазыр болгъанларын белгилегенди.

Тюбешиу жууаплы органлагъа эсгертиулени къабыл кёрюу бла бошалгъанды. «Полициячыланы бла сабийлени эркинликлерин сакълау бла кюрешген организацияла бла байламлыкъла, сёзсюз, хайыр келтирликдиле»,-дегенди  жыйылыуну эсеплерин чыгъара, полицияны участка уполномоченныйлерини ишлерин къурау эм акъылбалыкъ болмагъанланы ишлери жаны бла бёлюмню башчысы Мурат  Хажнагоев.

«Тёгерек столгъа» къатышханла институтну музейинде болгъандыла. Анда  Россейни МВД-сында акъылбалыкъ болмагъанланы ишлери жаны бла бёлюм эмда акъылбалыкъ болмагъанла аманлыкъ этгенлери ючюн болжаллы халда тутулгъан араны къуралыууна аталгъан кёрмюч хазырланнганды.