Жолла мардалагъа келиширча

Къабарты-Малкъарда  туризм объектлеге элтген жолла тап эм къоркъуусуз болур ючюн,  аслам иш этиледи. Бу жаны бла Къабарты-Малкъарда магъаналы да, уллу да къурулушладан бирине Экинчи Чегем–Булунгу жолну санаргъа боллукъду. Аны 27 километринде тынгылы ремонт ишле бардырылгъанлы иги кесек болады. Быйыл тийишли ишле «Жашау этерча инфраструктура» жангы миллет проектге кёре тамамланадыла, деп билдириледи КъМР-ни Транспорт эмда жол мюлк министерствосуну пресс-службасындан.

 Мында черек жагъаланы кючлейдиле, жардан таш, топуракъ тюшмезча, жауун суула саркъырча мадар этиледи. Ызы бла специалистле, жолну мурдорун жарашдырып, тротуарла салып, къоркъуусузлукъну жалчытырча аберилени да тохташдырып кюрешедиле.

 Проектге кёре Черек чучхурладан башлап огъартын эки машина ёталмагъан жерледе жол жети метрге кенгертилгенди. Кече жарытырча чыракълы чыпынла салыннгандыла, жаяу жюрюгенлеге тротуарла, машиналагъа майданла да жарашдырылгъандыла.

Къоркъуусузлукъ жалчытылынырча да бир къауум жумуш тамамланнганды. Ол санда жолну мурдору кючленеди, жауун суу саркъырча быргъыла, арыкъла салынадыла, жардан таш, топуракъ оюлмазча, черек жагъаларын суу таламазча бетондан хунала ишленедиле.

Къыш кезиуде черекле таркъайгъанда, кёпюрлени чигинжилерин орнатыргъа тап болады. Анга кёре кёпюрчюле Чегем сууда эм башха черекледе да  тийишли ишле бла кюрешедиле. Эм биринчи аркъауланы тутарыкъ чигинжилени эм хунаны да салып бошап, башха жумушланы тамамлайдыла.

 Миллет проектге кёре эм Регион фонддан бёлюннген ахчагъа Чегем, Кёк-Таш, Жуууннгу суу, Абардан суу, Жылгы суу, Булунгу суу черекледе эм башха жерледе да тогъуз кёпюр жангы мардалагъа келиширча боллукъдула. Саулай алып айтханда, объектлени узунлукълары 316 метрден аслам болады. Жууукъ заманда эки кёпюр хайырланыргъа берилликдиле. Къалгъанларында да мурдорларын, аркъауларын салып  кюрешедиле.

Кюн жылыгъа айланнганлай, жолну Эл-Тюбюне дери кесегине   асфальт жайып башларыкъдыла. Ызы бла къоркъуусузлукъну жалчытырча темир буруула тартырыкъдыла, жорукъланы билдирген белгиле эм ызла да саллыкъдыла.     

Планнга кёре Чегем ауузунда жолну толусунлай 2026 жылда бошаргъа   керекдиле.