Атталаны Жамалны аты бла – журналист премия

«Заман» газетни редакциясыны коллективи  анга кёп жылланы башчылыкъ этип тургъан Атталаны Жабирни жашы Жамалны аты айтылгъанлай турур ючюн, журналист премия тохташдырыуну дурус кёргенди. КъМР-ни Журналистлерини союзуну правлени  да ол башламчылыкъны къабыл этгенди.

Атталаны Жамал «Заман» республикалы жамауат-политика газетни баш редактору болуп  1998 жылны март  айында келип, анга 23 жылдан артыкъ башчылыкъ этгенди. Ол Къазахстанны къырал университетинде журналист жаны бла профессионал билим алгъан биринчи таулу болгъанды, ол республиканы басма органларында да тюрлю-тюрлю къуллукълада ишлегенди, Тырныауузда шахар газетни редактору болгъанды, ызы бла Тырныауузда КПСС-ни шахар комитетини бёлюмюне башчылыкъ этгенди, партияны Къабарты-Малкъар обкомуну бёлюмюню таматасы болгъанды.

«Кабардино-Балкарская правда» газетни баш редакторуну орунбасары болуп да бир ауукъ жылны  ишлегенди. Бир ненча жылны Къабарты-Малкъар Республиканы тыш байламлыкъла жаны бла министрини биринчи орунбасары болуп тургъанды. Сынаулу башчыныча, аны Элбрус районну администрациясыны таматасына да тийишли кёргендиле.

Къайсы къуллукъда да Жамал Жабирович иш кёллюлюгю, оноу эте, сёлеше  билгени, ишчи нёгерлерине сакъ болгъаны бла айырмалы эди. Ол чынтты журналист, оюмлу политолог болгъанды. Аны билимини теренлигине, эсине бир да болмагъанча кёп зат сыйыннганына ким да сейир этерча эди.

Бюгюнлюкде бизни республикабызда чыгъа тургъан кёп газетлени араларында «Заман» кёп жаны бла айырмалы эсе, аны ол даражагъа жетдириуде Атталаны Жамалны къыйыны уллуду.

Жамал Жабирович тири эмда жамауат адам болгъанды. Республиканы айныуу, жашауу бла байламлы ишлеге къатышмай къалмагъанды. КъМР-ни Жамауат палатасыны къауумуна да ол ма аны ючюн айырылгъанды, кёп жылланы аны таматаларындан бири болуп тургъанды.

Ол кёп къырал саугъалагъа, даражалы дипломлагъа, сыйлы атлагъа да тийишли болгъанды.  Къабарты-Малкъар Республиканы Сыйлы грамотасы бла  саугъаланнганды, «Россей Федерацияны маданиятыны сыйлы къуллукъчусу», «Къабарты-Малкъар

Республиканы маданиятыны сыйлы къуллукъчусу», «Къарачай-Черкес Республиканы сыйлы журналисти» деген даражалы атланы намысы бла жюрютгенди. 

 Алайды да, «Заман» газетни редакциясы КъМР-ни Журналистлерини союзуну эмда Атта улуну юйюрюню себепликлери бла Атталаны Жамалны аты бла тохташдырылгъан премиягъа бек  иги журналист ишни сайлар мурат бла конкурс башланнганын билдиреди. Аны эсеплери жылны ахырында чыгъарыллыкъдыла, саугъалау а 2026 жылны 13 январында Басманы кюнюнде боллукъду. Ахча саугъаны уа Атталаны Жамалны юйюрю берирге ыразылыгъын билдиргенди.