Хунерлиле бла билимлиле ачыкъланнгандыла

Кёп болмай Къабарты-Малкъар къырал университетде студентлени бла аспирантланы араларында предпринимательликни тарыхыны XI битеуроссей олимпиадасыны регион кесеги ётгенди. Анга  республиканы вузларындан жетмишден  аслам студент къатышханды. Аланы алгъышлай, КъМКъУ-ну Право, экономика эм финансла институтуну таматасы  Елена Машукова, КъМКъАУ-ну Къошакъ билим бериу жаны бла  институтуну таматасы Уяналаны Борис эмда "Иш кёллю Россей" жамауат организацияны бёлюмюню келечиси Гузеланы Индира сёлешгендиле.

Олимпиада юч сагъат чакълы баргъанды. Аны кезиуюнде  соруулагъа жууапларгъа эм белгиленнген  энчи бир темагъа эссе жазаргъа керек болгъанды.  Ол санда дерсге терминле, определенияла, кроссворд  да киргенди. Андан сора да, жандауурлукъ ишлери бла атларын  айтдыргъан инсанланы, политиклени да  эсге тюшюрюрге керек болгъанды.    Эсеплеге кёре,  КъМКъУ-ну  Право, экономика эм финансла институтуну «Экономика» бёлюмюню экинчи курсуну окъуучусу Артур Сохроков биринчи жерге тийишли болгъанды.  КъМКъУ-ну бла КъМКъАУ-ну студентлери Инна Закураева бла Байсолтанланы  Альбина - экинчи, Геккиланы  Жамиля, Мадина Карданова бла Ляна Мафедзова уа ючюнчю жерлеге чыкъгъандыла.

Олимпиада «Россейни предпринимательлик тарыхы» проектни чеклеринде «Иш кёллю Россей» жамауат организацияны, Россейни тарых  жамауатыны  эм Москваны къырал университетини тарых факультетини  башламчылыкълары бла бардырылады.