Саугъагъа – жырла, тепсеуле да

Уллу  Ата журт урушда Хорламны жарыкъ  байрамына аз заман  къалгъанды. Быйылгъы жыл а дагъыда Ата журтну къоруулаучусуну жылы болгъаны бла байламлы республиканы школларында, башха окъуу юйлеринде тюрлю-тюрлю къууанчлы ишле, ингирле, тюбешиуле да бардырыладыла, концертле кёргюзтюледиле.

Бу кюнледе аллай къууанчлы ишледен бири Нальчикни Искож тийресинде  Маданиятны айнытыуну  арасында да болгъанды. Мында   Къабарты-Малкъарда  «Патриот» жамауат биригиуню эмда КъМР-де Тиширыуланы союзуну себепликлери  бла концерт къуралгъанды. Анга  къараргъа болмагъанча кёп адам келгенди. Аланы араларында  уллайгъанла, школчула,  жамауат биригиулени келечилери  да бар эдиле.

- Уллу Хорлам бизни барыбызгъа да нек багъалыды? Уллу Ата журт урушха кёп къалмай хар юйюрню да келечиси къатышханды да аны ючюн. Къабарты-Малкъардан  фронтха 60 минг жаш бла къыз кетген эдиле, 38-ден асламы уа  бизни барыбызны да  бюгюннгю тынчлыкълы жашауубуз  ючюн жан бергендиле, кёпле белгисиз тас болгъандыла, тюрлю-тюрлю сылтаула бла юйлерине къайтмай къалгъандыла. Бизни республикадан Уллу Ата журт урушха къатышхан жашладан 26-сына Совет Союзну

Жигити деген сыйлы ат берилгенди.  Къабарты-Малкъарны ара шахары Нальчик да Ата журт урушну биринчи даражалы орденине тийишли болгъанды, - дегенди, къууанчлы жыйылыуну ача, Маданиятны айнытыуну арасыны директору Юля Ордокова. 

Ол бюгюнлюкде битеу республикада Уллу Ата журт урушну жаланда онбеш ветераны къалгъанын да  билдиргенди. «Барыбызны да алагъа бусагъатда жюрек ыразылыгъыбызны билдирир онгубуз барды», - дегенде, залда олтургъанла, ёрге туруп, ветеранлагъа, къарс къагъып, сый бергенлерин билдиргендиле. 

Къонакъланы эмда концерт программагъа къатышханланы «Аскер къарындашлыкъ» жамауат биригиуню регион бёлюмюню толтуруучу  комитетини таматасы, Кишиликни ордени бла саугъаланнган  Владимир Абаноков да келе тургъан жарыкъ байрам бла къызыу алгъышлагъанды. Ол бусагъатда энчи аскер операциягъа  республиканы хар элинден, шахарындан да кёп жашла къатыша тургъанларын, ала юйлерине, тукъумларына, республикагъа да айып келтирмей, аскер борчларын бет жарыкълы толтургъанларын чертип,  юйлерине   жууукъ заманда хорлам бла сау-саламат къайтырларын  да тежегенди. 

- Биз Уллу Ата журт урушну кезиуюнде аталарыбызны, аппаларыбызны жигитликлерин,  Хорламны ала келтиргенлерин бир заманда да  унутурукъ тюйюлбюз. Сёзсюз, СВО-гъа къатышхан жашларыбызны атлары да тарыхха  алтын харфла бла  жазыллыкъдыла»,- дегенди  Владимир Абаноков.

Концерт программагъа уа КъМР-ни сыйлы артисти, «Патриот» жамауат биригиуге кирген Эльдар Дымов, Жанатайланы Мариям эм жаш артистле да тири къатышхандыла. Ала да жарыкъ жырлары, ариу тепсеулери бла къараучуланы къууандыргъандыла, кёллерин кётюргендиле. 

Ахырында «Патриот» эмда «Аскер къарындашлыкъ» жамауат биригиулени келечилери  концерт программагъа къатышхан жашчыкълагъа бла къызчыкълагъа дипломла бергендиле.