Эм тирилеге – ыспас сёзле

Нальчик шахарны жер-жерли администрациясында Жаш айырыучуланы айлыгъы бошалгъанына жораланнган къууанчлы жыйылыу болгъанды. Анга шахарны эмда аны тийресинде эллени школларыны окъуучулары,  устазлары да чакъырылгъандыла.

Жыйылыуну ишине Къабарты-Малкъар Республиканы Айырыу комиссиясыны секретары Ксения Сундиева, Нальчикде Тиширыуланы советини таматасы Лидия Дигешева да  къатышхандыла. Келгенлени Нальчикде шахарны айырыу комиссияны  таматасы Налоев Николай алгъышлагъанды. Ол жаш тёлюню айырыулагъа тири къатышыулары бек магъаналы болгъанын чертгенди. Окъуучулагъа насийхат сёзюнде ол былай дегенди: 

– Къыралны, республиканы, хар юйюрню, сизни кесигизни да келир заманыгъыз  сизни  къолугъуздады. Аны себепли сиз иги окъургъа, низамлы болургъа, кёп билирге итинирге керексиз. Биз сизге бек ышанабыз! 
Жыйылыуну кезиуюнде жаш тёлю правону билирча, аны жорукъларын сакъларча этиуге юлюшлерин къошханлагъа  эмда айлыкъгъа тири къатышхан жашлагъа бла къызлагъа КъМР-ни Айырыу комиссиясыны  грамоталары берилгендиле, ыспас сёзле да айтылгъандыла.