Студентлени санына къошулады

Бусагъатда Къабарты-Малкъар къырал университетде 50 къыралдан 2448 адам окъуйду. Саулай алып айтханда, вузну студентлерини 12,57 процентиди эм  къырал салгъан стратегиялы борчну толтуруугъа толу келишеди. 

Билим бериу жаны бла халкъла аралы байламлыкъланы кючлеу Россейни политикасыны къыйматлы бёлюмлеринден бирине саналады.  

Эсге сала айтсакъ, РФ-ни Президенти Владимир Путин 2030-2036 жыллагъа  къыралны вузларында тыш къыраллы студентлени санын 500 мингнге жетдирирге  борч салгъанды. Аны толтурур ючюн  иги кесек иш этиледи. Ол санда  ала къатышырча билим бериу программала кенгертиледиле эм алагъа иги болум къуралырына дайым къайгъырылады. 

Университет, миллет проектлени толтуруугъа къошумчулукъ этгенден сора да, законодательствону излемлери бузулмазына къаты контроль бардырады. Анга кёре тыш къыраллы студентле бла ишлеу Федерал законну жорукъларына  тийишлиликде тамамланады. 

Бу жаны бла бек алгъа студентле законну бузмазгъа кюрешедиле. Студент регистрация этилген жеринден кеси аллына  башхасына кёчсе, вуз юч кюнню ичинде  аны  тийишли органлагъа билдирирге керекди. 

Тыш къыраллы студентле бюджет жерде окъурукъланы сайлагъан конкурсха къатышмайдыла. Алагъа РФ-ни Правительствосуну квотасына кёре федерал бюджетден энчи жерле бёлюнедиле. Контракт бла жаланда Россейни инсанлары окъуйдула, тыш къыраллы студентлеге уа ол энчи халда бериледи. 

Вузгъа  да ала энчи амал бла киредиле, конкурс да аланы араларында ётдюрюледи. Алагъа берилген жерле кесибизни инсанларыбызныкъыладан башхадыла эм  жерлешлерибизге чырмау салырча тюйюлдюле.