Казбек Коковну республиканы жамауатына чакъырыу сёзю

Бирси кюн эрттенликде республиканы районларындан биринде адамсыз учхан аппарат тюшгенди деп, аллай хапар чыкъгъанды. Аны тюз болгъанын бла къалгъанын тийишли службала тинте турадыла. Аны бла байламлы КъМР-ни Башчысы Казбек Коков телеграм-каналыны юсю бла республиканы жамауатына чакъырыу этгенди.

«Къабарты-Малкъар Республиканы хурметли жамауаты эмда аны къонакълары!

РФ-ни Къоруулау министерствосуну билдириулерине кёре, 8 апрельде 20.00 сагъатдан башлап 9 апрельде 06.00 сагъатха дери ПВО-ну къалауурлукъ этген сауутлары Украинаны адамсыз учуучу аппаратларындан 158-син тутхандыла эмда гунч этгендиле. Ол санда Шимал Осетия-Алания Республиканы жерини башында 15-син эмда Ставрополь крайны кёгюнде да бирин агъызгъандыла.

Багъалы шуёхла!

Бу затланы билген бек магъаналыды:

адамсыз учуучу аппаратны жерге тюше тургъанын кёрген эсегиз, жерде аланы кеслерине неда сыныкъларына тюбеген эсегиз:

алагъа жууукъ бармагъыз, къолларыгъыз бла тиймегиз,  тепдирирге кюрешмегиз;

амал болгъаны къадар тёгерекде адамлагъа аланы къатларына жууукълашыу къоркъуулу болгъаныны юсюнден  эсгертигиз;

адамсыз учуучу аппаратла кёрюнмезча къоркъуусуз жерни сайлагъыз;

аппаратны кёргенигизни юсюнден, ол къалайгъа эмда къачан тюшгенин да мычымай билдиригиз;

ПВО-ну сауутлары адамсыз учхан аппаратны агъыздырыу мадарла эте тургъанларын кёрсегиз, суратха неда видеогъа алдырыргъа, аланы Интернетге  салыргъа да кюрешмегиз.

Болушлукъгъа терк жетиучю службаланы мобиль телефонуну номерин эсигизге салама – 112»