Къалай игиди арабызда жан аурута билген адамланы болгъанлары

Итлени жыйын болуп айланнганлары уллугъа, гитчеге да къоркъуулуду деп,  газетледе жазылады, телевидение бла да айтылады. Болсада итле тутханланы араларында жууапсызла, сансызла да азаймайдыла. Аланы хаталары уа кёплеге жетеди. Аны кесими юсюмде да сынагъанма.

Бир кюн жумуш бла жолгъа чыгъама.  Эрттенлик эди да, орамыбызда   адам да кёрюнмейди. Къар жаууп эди да, жыгъылып къалмагъы эдим деп,  тынч-тынч атлайма. Бир заманда эки ит, бир бирге ал бермей, чабадыла.   Алагъа эс бурмай барама. Бир кесекден а дагъыда башхала къошуладыла, юрюп башлайдыла. «Тийре итле манга не этерикдиле»,- деп, артха бурулмай барама.

Олсагъат итледен бири аякъларыма уруп, аркъам бла  жерге аудурады. Насыбыма, алайда машинасы бла кюреше тургъан бир киши эмда бир тиширыу, къатыма терк жетип,  къобарыргъа кюрешедиле. Мени уа, башым асыры ауругъандан, кёзлерим  къарангы этедиле. Кеф адамча, тентирей, къобаргъа кюрешеме.  Ол кезиуде  беш-алты  мазаллы ит, тёгерегибизни алып, мени таба айланып,  юрюп, къыжырыкълайдыла.

Эр киши, тиширыу да  итлени къыстап, мени машинагъа олтуртуп, юйюме жетдирирге айтадыла. Мени уа башым бек ауруйду, къалай болуп къалдым былай деп,  жюрегим да къыйналады. Тиширыу: «Атам бир бек аурупду да, анга врачны чакъырыргъа барама, ансы биргенге юйюнге дери барыр эдим, кечгинлик бер»,- дейди.

Машина юйюбюзге жууукъда тохтайды. Тюшгенимде, биягъы эр киши,  чыгъып: «Юйюнге дери тап жеталлыкъмыса, огъесе ашыргъанмы этейим?» - деп да сорады. Унамайма, адамны къыйнаргъа артыкъ бек сюймейме.

Юйге келгенимде уа, чуругъуму ит жыртханын да кёреме. Таныш врачыма сёлешип, ишни болумун айтханымда, ол: «Мычымай терк болушлукъ берген машинаны чакъыр да, республикалы больницагъа барып, анда МРТ этдир башынга, уллу кёллюлюк этме, хата азданды»,-дейди.

Юйде къарт келинимден сора адам жокъду. Ол да, кесини келинине сёлешип, аны чакъырады. Бир кесекден ол энчи иели машина бла юйге жетеди. Руль артында  тиширыу олтурады. Артда келиним айтханнга кёре, мени бла болгъанны эшитгенлей: «Скорыйни» чакъыра турмагъыз, мен элтирикме»,- деп келген эди. Жолла уа бек къоркъуулудула. Анга да къарамай, таулу  къыз   келиним бла бирге Нальчикде республикалы клиника больницагъа элтеди. Аны къатына жетгенибизде: «Мен былайда сизни сакълап турлукъма»,-дейди.

Биз а, анга ыразылыгъыбызны билдирип: «Не заманда чыгъарыгъыбызны билмейбиз, сакълама, жумушларынга бар», - деп, къаты болабыз.  Къыз а:«Бир да, эки да айтмагъыз, мен келтиргенме, артха да кесим элтирикме»,-дейди.  Ол   больницагъа кирген жерде  сагъатдан артыкъ сакълап турду. Артха, юйюме, да келтирди.

Битеу ол затланы айта келгеним, насыпха, къатыбызда  ахшы, огъурлу адамла  кёпдюле. Ол кюн асыры абызырагъанымдан, мени итледен къоруулагъан эр кишини, тиширыуну  да  атларын сормагъанма, аны къой, сау болугъуз деп окъуна айталмагъанма. Мени ючюн машинасын жегип, ол къыяма, бузлу жолла бла  элден шахаргъа больницагъа элтип, анда да  аягъы  юсюнде сагъатдан артыкъ заманны сюелип, артха, юйюме, алып келген  къызны атын, тукъумум да  соралмагъанма, анга да ыспас эталмагъанма. Аланы барындан да кечгинлик тилей, жюрек ыразылыгъымы билдиреме. Къалай игиди аллай адамланы къатыбызда жашагъанлары.

Итлени тутханлагъа уа айтырыгъым: элде  къартла, сабийле да бар, итле алагъа уллу къоркъуу саладыла. Эшите-эшите турабыз, андан-мында  хауле жаныуарла бир кесек къарыусузуракъ адамланы талагъанларын. Ала жыйын болуп ёрге, энишге жортадыла, гитчеге, уллугъа да чабадыла, кир-кипчик бла  хуржунланы чачадыла. Хасания уллу болгъанлыкъгъа, элде бир бирни танымагъан, билмеген бек азды. Бир бирге сакъ болуу а хар кимни да борчуду.