Минги тауну этегинде къууанч

Малкъар халкъны туугъан жерине къайтханына, Жангырыу кюннге аталып  Элбрус районну  учрежденияларында къууанчлы байрамла ётгендиле. Быйыл сабий садланы бла мектеплени, жаш тёлю араланы бу байрамгъа былай жууаплы хазырланнганлары ала тарыхны хурметлей билгенлерин кёргюзтгенди. Аланы  мамыр жашаугъа эркин атлагъанлары къууандырады.

Тырныауузну Малкъар халкъны кёчгюнчюлюгюне  аталгъан майданында бюгюннгю байрамгъа жораланнган «Жаша, жашна мени Малкъарым!» деген кёрмюч ачылгъанды. Районну администрациясыны тутхучлугъу бла «Турна» деген малкъар маданият араны келечилери бу жумушну тынгылы жалчытхандыла. Кёрмючге Хаджиланы Даниялны коллекциясындан суратланы репродукциялары, сабийлени миллет маданиятха жораланнган, дагъыда бизни жерлешибиз Мила Керефни суратлары киргендиле.   Тырныауузчуланы, элледе жашагъанланы да ол кёрмючню бир ауукъ заманны ичинде кёрюрге аламат онглары барды.

Районну «Сабийликни Навигаторлары»  биригиую да  байрамгъа къошумчулукъ  этгенди.  Биригиуню келечилери районну абадан адамла тургъан, солугъан эм саулукъларына бакъдыргъан социал араны бусагъатдагъы солуучуларына  концерт программа кёргюзтюп эмда саугъала берип, кёллерин кётюралгъандыла.  Ол кюн алайда  назмула бла жырла айтып, ойнап, тепсеп да, къартланы бир  кюнлерин жарыталгъан фахмулу сабийлеге бла школланы таматаларыны юйретиу жаны бла кенгешчилерине уллу ыспас этерчады. Сабийле кеси къоллары бла жарашдыргъан саугъала абаданлагъа бек багъалы эдиле. Андан сора да  татлы ашарыкъладан бла кёгет-жемишден толгъан ариу четенле саугъалагъандыла. Арада солугъанланы атларындан Мырзаланы Идрис   байрамны къурагъанлагъа, анга къатышханлагъа да уллу ыспас этгенди. Сабий жюрекледе абаданланы сыйлары сакъланнган чакъда  намыс, адет таркъаймазын да  чертгенди ол.

Тырныауузну 5-чи номерли гимназиясыны «Золушка» сабий садыны «Мишутки» къаууму, байрам кюннге жоралап, «Ачыкъ эшиклени кюню»  акцияны  бардыргъандыла.  Бу къауумну юйретиучюлери Хоконова Юлия бла Гаджибекова Земфира сабийле бла жарашдыргъан ариу байрам саулай шахарны жамауатына айтылгъанды.

Элбрус районну Маданият Управлениясы, хар замандача, районну жамауатын къууандыралгъанды. Чыгъармачылыкъны сюйген къайсы бири да мында  кёлюне, жюрегине жетерча кёрмючле табалгъанды. Районну Отарланы Омар атлы краевед музейинде эрттенликден окъуна келгенлени саны бир да азаймай эди.  Къулийланы Къайсын атлы музейге тынгылы ремонтдан сора энтта бир зал къошулгъанды. Музейни ишчилери белгили суратчыланы ишлери бла шагъырей этип турлукъдула келгенлени. Анда суратчыла Гуданаланы Борисни, Курданланы Валерийни, Ёзденланы Мухтарны, Сарбашланы Азнорну, Геннадий Темиркановну, Александр Поляковну, Александр Острякинни бла Бачурин Юрийни ишлери бла шагъырейленнгендиле къонакъла. Ёзденланы Мухтар а кесини 300-ге жууукъ ишин музейге саугъалагъанды. Ол чыгъармачылыкъ хазнабызны иги да байыкъдырлыгъы сёзсюздю.

Маданият юйню фойесинде Малкъар халкъны къол усталыгъына жораланнган кёрмючле къуралгъандыла. Анда Джаппуланы Езетхан кесини арасында хазырлагъан кийизлени ариулукълары бла къонакъланы шагъырей этгенди. Кёплеге ол ишле сейир кёрюнюп, аны ызын сурагъанла да болгъандыла. Кийизлени ариулукъларын айтып айтмазча эдиле.

Къол бла этилген жаулукъланы тюрлюлерин а  Тетууланы Изольда кёргюзтгенди.  Ол кеси жыйгъан, жарашдыргъан, жангыртхан жаулукълары бла ары келген тиширыуланы сукъландыргъанды. Ол жаулукълагъа уста салгъан накъышла, жомакъдача, ариу жарашып, жаулукъланы унутулмазча даражагъа жетдиргендиле.

Районну жамауаты не жаны бла да фахмулуду. Маданият юйде къуралгъан  концерт программада  къараучуланы кёллерин кётюре, жюреклерине жарыкълыкъ салгъанды. Элледен келгенле, абаданла, сабийле да, залны толтуруп, зауукълукъ тапхандыла.

Бу байрамгъа районну учрежденияларыны таматалары бла келечилери, жамауатны абадан тёлюсю, къарачай-малкъар халкъны белгили артистлери келгендиле. Аланы алгъышлай, Элбрус муниципал районну таматасы Отарланы Мухтар сёлешгенди. Ол аппаларыбыз бла ынналарыбыз сынагъанны энди бир тёлю  сынамазын тежегенди, кючлю къыралыбызда мамырлыкъ, саулукъ эм къууанч болурун тилегенди.

Къарачай-Черкесден  келген алгъышлау къагъытны окъугъанларында, бизникиле, аны сыйлы кёрюп,  къарслары бла ыразылыкъларын билдиргендиле. Музыкалы кесегине къатышхан артистле Мусукаланы Жамиля, Мусукаланы Руслан, Тёппеланы Алим, Ауэс Зеушев, «Салам» миллет тепсеулени юлгюлю ансамбли, Байсолтанланы Инара, Атмырзаланы Элдар, Байкъулланы Солтан, Катчиланы Руслан бла Роберт, Жаникаланы Элдар, районубузну аламат жулдузу Джаппуланы Ахмат концертни ариу бардыргъандыла.

Элбрус районну Маданият управлениясыны башчысы Толгъурланы Жаннет ишчи нёгерлери бла бирге миллетини быллай байрамларын хар заманда да тынгылым хазырлайдыла. Быйыл да  ала хар ары келгенден ыразылыкъ, махтау сёзле эшитгендиле. Таркъаймасын къууанч кюнлери таулу халкъны!