Игиликге талпыныу бла

Бу кюнледе Х.М. Бербеков атлы Къабарты-Малкъар къырал университетде Малкъар халкъны жангырыу кюнюне аталгъан къууанчлы ишле баргъандыла. Аланы окъуу юйню Отарланы Керим атлы маданият арасы къурагъанды.

Бек аллында университетни Х. С. Темирканов атлы уллу залында Отарланы Керим атлы маданият арада баргъанды къууанчлы жыйылыу. Аны аллында бу араны директору Байтуугъанланы Исмайыл ары келгенлени малкъар халкъны бек уллу да, магъаналы да, сыйлы да байрамы бла алгъышлап, алагъа кёп игиликле, бийик жетишимле тежегенди.

Ызы бла сахнада ол ишни бардыргъанла миллетни иги адамларын, аланы этген жетишимлерин эсгергендиле. Андан сора Отарланы Керим атлы маданият араны ишчилери, ана тилни сакълаугъа кюч салгъанлагъа, миллетни маданият жаны бла айнытханлагъа ыразылыкъларын билдире, аланы бир къауумуна – культурада жетишимли ишлегенлеге, журналистлеге, жамауат ишчилеге, ол санда ана тилден бла адабиятдан шахар, эл школланы устазларына да махтау къагъытла бла саугъала бергендиле.

Къабарты-Малкъарны Жазыучула союзуну председателини орунбасары Беппайланы Муталип, бу араны этген ишине, устазлагъа да энчи ыразылыгъын билдирип, алагъа, бу жарыкъ байрамда ары келгенлеге да алгъыш айтханды.

Къонакъбайла ызы бла жамауатны университетге кирген жерде бу кюннге деп хазырланнган кёрмючге къараргъа чакъыргъандыла. Анда уа барыбыз да сюйген, сый берген адамланы – сабийлени, тиширыуланы, элли адамланы, белгили поэтлени, жазыучуланы, урушну эм урунууну жигитлерини бетлерине къараргъа, тарых жолунда артха къайтып, кетген ёмюрледе ата-бабаларыбызны да тансыкъларгъа онгубуз болгъанды. Аланы тюрлю-тюрлю жыллада республикада жашагъан суратчыла алдыргъандыла. Ол суратланы араларында Шахмырзаланы Алексейни, Толгъурланы Камалны, Байсыланы Ахматны ишлерин таныгъан къыйын тюйюл эди. Кёрмючде Малкъар халкъны къол хунерин кёрюрге да боллукъ эди. Локияланы Рашидни кийиз музейинден келген экспонатла жасай эдиле тёгерекни. Дагъыда ары келгенле Россейни халкъ устасы Бачиланы Хамзат этген сауутланы кёргендиле. Алай бла байрам баргъан кюн университетни къонакълары малкъар халкъны маданияты эмда тёре-адетлери, жашау халы бла шагъырей болур онг тапхандыла.

Байрамны экинчи жарымы университетни арбазында ётгенди. Алгъыш плакат бла, миллет кюйюзле бла жасалгъандыла мекямгъа кирген атлауучла. Алайда болгъан концертге къараргъа кёп адам жыйылгъанды. Ол санда студентле бла аланы устазлары, маданият жаны бла ишлегенле, жамауат биригиулени келечилери… Ары келгенлеге айланып, бусагъатлада университетни ректоруну къуллугъун толтургъан Юрий Альтудов сёлешгенди. «Быйыл 28 мартда малкъар халкъ, онюч къыйын жылны кёчгюнчюлюкде Орта Азияда бла Къазахстанда туруп, Ата журтуна къайтханлы 68 жыл болады. Бу байрам энчиди – ол тюзлюкню бла кертини хорламларын белгилеген шартды. Биз бюгюн кёп миллетли республикада бирге жашайбыз. Малкъар халкъны келечилери къайда да жетишимли, махтаулу болуп ишлейдиле. Халкъыбызны жарашыулугъу, бирлиги республиканы айныууна себеплик этген кючдю», – деп Юрий Камбулатович барыбызгъа да мамырлыкъ, жюрек ырахатлыкъ тежегенди. Ызы бла малкъар халкъны бу байрам бла университетде А.А. Ципинов атлы адыг маданиятны арасыны келечилери, ол санда аланы директорлары Мадина Езаова алгъышлагъандыла.

Байрамгъа жораланнган концерт программагъа университетни студентлери, башха ишчилери, Музыка театрны артистлери, профессионал эстрада жырчыла, башха артистле да къатышхандыла. Къулийланы Къайсын атлы Малкъар къырал драма театрны артисти Мызыланы Таубий Кязимни сыфатында назму окъугъанды. Назму айтханла дагъыда болгъандыла. Ол санда бу байрамны бардыргъанла. Ала малкъар халкъгъа аталгъан акъ сёзден сора да, бизни поэтлерибизни – Мечиланы Кязимни, Къулийланы Къайсынны, Отарланы Керимни – назмуларын къатлагъандыла.

Ары келгенлени, жыр айтып, «Жашлыкъ» жыр къауум, жырчыла Тёппеланы Алим, Азамат Цавкилов, Жеттеланы Камилла, Бийланы Аслан, Алтууланы Халимат, Улбашланы Жаннета, Тербулатланы Рамазан эм башхала къууандыргъандыла. 

Тепсеб а къарагъанланы кёллерин миллет ансамбль ле «Эльбрус» бла «Насып» эмда «Салам» атлы миллет тепсеуню юлгюлю ансамблини солистлери Къочхарланы Мёлек бла Омарланы Тимур кётюргендиле. 
Хауада уа Кязимни ёлюмсюз тизгинлери зынгырдай эдиле.