Жарыкъ умутла, ёхтемлендирген чакъла

28 мартда Къабарты-Малкъарда бардырылгъан байрамланы санында сабий садлада концертлени энчи белгилерчады. Аладан биринде – Нальчик шахарны 34-чю номерли прогимназиясында концерт да жыйылгъанланы къууандыргъанды. Къонакъланы араларында КъМР- ни Парламентини башчысыны орунбасары Жанатайланы Салим, КъМР- ни Парламентини комитетлерини башчылары Нина Емузова бла Текуланы Амырбий, «Заман» газетни баш редактору Къонакъланы Хасан, Нальчик шахарны Билим бериу департаментини специалисти Людмила Тлиашинова, назмучу эм тилманч Бегийланы Абдуллах, Нальчик шахарны 16-чы  номерли школуну директору Аналаны Марат эм башхала бар эдиле.

Къууанчлы жыйылыу Россейни эм КъМР-ни гимнлеринден башланнганды. Ызы бла жырчы Гергъокъаланы Халимат бла режиссёр Малкъарланы Карина  битеу да халкъыбыз Ата журтубуздан 1944 жылда кёчюрюлгенини эм 1957 жылда уа жерибизге къайтханыбызны юсюнден толу хапарлагъандыла. Прогимназияда музыканы устазы Марина Долова, малкъар тилни устазы Мушкаланы Эльмира, башланнган классланы устазы Къадырланы Марина бла педагог-психолог Моттайланы Элина хар сабийни энчи фахмусуна кёре бир номер къурагъандыла. Окъургъа, жазаргъа энди юйрене тургъан балала кеслерин сахнада жюрюте билгенлери, назмуда хар сёзню шатык айтханлары, миллет тепсеулени ариулукъларын кёргюзтгенлери жыйылгъанланы кёллендиргенди, жюреклерин ёхтемликден толтургъанды.

Къайсынны жюз бла къыркъ тилге кёчюрюлген поэзиясыны череги шууулдай эди залда, желча, хар бирибизни башыбызны сылай, игиликге, насыпха итиндире, жарыкъ умутла саугъалай. Жанатайланы Салим къысха сёзюнде бош айтмагъанды: «Бюгюнча эрттеден бери да къууанмагъан эдим», - деп. Нина Емузова да къошханды: «Хар зат да сабийликден башланады. Жырларгъа, тепсерге, назму айтыргъа да сабийликден башларгъа керекди. Биз жиляу-сыйыт эте билебиз, къууаныргъа, байрамларыбызны бийик даражада бардырыргъа да юйренирге керекбиз. Бу прогимназияда  къууанч кюнлеге аталгъан байрамланы ариу къуралгъанлары ахшы тёреди. Сау болугъуз!»

«Иоканто» вокал студияны окъуучусу Трамланы Самира «Таулу» деген жырны жырлагъанды, Элеккуланы Нурмухамед башчылыкъ этген  «Насып»  халкъ ансамбль тепсеу усталыгъын кёргюзтгенди.

Къонакъланы Хасан прогимназияны коллективине эм ары жюрюген сабийлеге байрамны бийик даражада къурагъанлары ючюн ыразылыгъын айтханды. «Бу байрам къуралгъанлы бери да малкъар халкъ республикада жашагъан миллетлени келечилери бла бирге белгилейди. Ол а арада шуёхлукъ жылдан-жылгъа кючлене баргъаныны белгисиди», – дегенди ол. Сора Къонакъ улу республикада жашагъанлагъа мамырлыкъ эм айныу тежегенди.

Таулу халкъны байрам кюнюнде Кязимни аты сагъынылмай къаллыкъ тюйюл эди. Сабийле Къайсынны устазы, халкъыбызны тутуругъу, ийманны кючлендирген, дунияны зорлукъ бийлегенде окъуна башха заманла келликлерине ийнандыргъан Кязимни назмуларын да окъугъандыла.

Байрамда республикада жашагъан жюзден артыкъ халкъланы араларында шуёхлукъну юсюнден кёп айтылгъанды, назмула да окъулгъандыла. Сабийлени интернационал халда юйретгенлери шёндюгю дунияда бек магъаналыды.

Урван районну Нарткъала шахарында Маданият юйден «Нартхасэ» ансамбль келген эди, Мухамед Тохов бла Мырзаланы Эльмира  уа  вокал фахмуларын кёргюзтгендиле. 

«Иоканто» студияда юйреннген  Виктор Ким «Зову тебя в Балкарию» деген жырны жырлагъанды. Аны сёзлерин белгили къабартылы назмучу Инна Кашежева жазгъанды.

Концертде Къулийланы Къайсынны бла Алим Кешоковну  араларында шуёхлукъ да эсгерилгенди, Жаболаны Амир Къайсынны Кешоковха аталгъан назмусун  окъугъанды.

Къууанчлы жыйылыуда Ата журтха сюймекликни юсюнден кёп айтылгъанды, экинчи классны окъуучусу Дениза Пекова «Родина моя» деген жырны да анга атагъан эди. Жаболаны Алия уа сольный тепсеу кёргюзтгенди.

Миллетибизни бюгюнлюкде айный баргъаны таулу ананы жигитлиги бла байламлыды. Къайсын бу оюмну «Ана» деген назмусунда ачыкъ суратлагъанды, аны Дуголаны Малик  окъугъанды.

Дагъыда кёп сейирлик номерле кёргюзтгендиле сабийле. «Заман» газетни баш редактору Къонакъланы Хасан жыл сайын бу прогимназияда байрамгъа сюйюп келгенин айтханды, концертни хазырлагъанлагъа жюрек ыразылыгъын билдиргенди. Гергъокъаланы Халимат да жыйылгъанланы жырлары бла къууандыргъанды. 

Прогимназияны директору Анжела Долова малкъар халкъны байрамы битеу республикада жашагъанланы байрамы болгъанын чертгенди эм барыбызгъа да  къууанч тежегенди.