Жаш тёлюге айныргъа онгла къурау баш борчха саналгъанды

«Россей» миллет арада «Биринчилени атламлары» битеуроссей жамауат-къырал сабий эм жаш тёлю биригиуню IV съезди ётгенди. Аны къууанчлы ачылыууна РФ-ни Президенти Владимир Путин да къатышханды. Кесини алгъышлау  сёзюнде ол ёсюп келген тёлюню тюз ниетли юйретиуде бу организацияны магъанасы уллу болгъанын белгилегенди. 

- Аны баш борчу жаш тёлюге хар жаны бла да себеплик этиудю. Нек дегенде жашауда биринчи атламларын этген хар инсан да  муратларына жетиуде билеклик этилгенин сезсе, андан ары кёлленип,  жетишимле болдурады. Жетишимге жетерге уа хар адам да сюйгенин барыбыз да билебиз, - деп белгилегенди Владимир Путин. 

Бу тюбешиуню баш кесегине Къараучуланы советини ишин санаргъа боллукъду. Аны кезиуюнде Президент сабийле, аланы ата-аналары эм насийхатчылары бла тюбешгенди. Андан сора жаш тёлю биригиуню таматасы, Россейни Жигити Артур Орлов доклад бла сёлешгенди. Кесини билдириуюнде ол эки жылны ичинде къаллай ишле тамамланнганларыны юсюнден айтханды.  

Къабарты-Малкъардан съездге «Биринчилени атламлары» деген битеуроссей жамауат-къырал сабий эм жаш тёлю биригиуню регион бёлюмюню башчысы Аслан Шипшев, педагог-психолог Бозаланы Расул, дагъыда  Шауаланы Асланбек, Александр Носов, Жарашууланы Лиза, Сабина Гетериева, Ислам Штымов къатышхандыла.

Съездге уа 89 региондан 1 мингден артыкъ адам айырылгъан эди. Ала абаданла бла бирге «Сыйлы китап» бла шагъырейленнгендиле эм Шуёхлукъну жылын белгилерге деп оноулашхандыла. Дагъыда Жангы жылны аллында бардырылгъан «Муратланы  назы тереги» деген акцияны эсеплерин чыгъаргъандыла.

- Андан сора да, тири  жаш тёлюню онглары  аслам болур ючюн энчи проектле да бардырыллыкъдыла, - деп чертгенди Артур Орлов. 

Делегатла организацияны 2024 жылда жетишимлерини юслеринден сёлешгендиле эм юсюбюздеги жылгъа борчларын белгилегендиле. Биригиуню Уставына тюрлениуле да кийирилгендиле. Шуёхлукъну жылыны белгисини конкурсуну эсеплери да чыгъарылгъандыла.  1200 конкурс ишден Чуваш Республиканы келечиси Гордей Васильевни «Лапа» кючюгю хорлагъанды. Андан сора да, жаш тёлю Биринчилени «Сыйлы китабына» кирген 11 магъаналы эсгертиулени юслеринден оюмларын билдиргенди. Аны мурдорунда социал сетьледе флешмоб бардырыргъа деп тохташхандыла. Алай бла, ол китапдагъы эсгертиуледен бирини юсюнден жаш адамлагъа кеслерини оюмларын ачыкъларгъа керек боллукъду. 

Андан тышында да,  съездни чеклеринде Илму-методика совет да ишин бардыргъанды. Ол кенгешде «Биринчилени атламлары» илму бла байламлы айнырча этиуню амалларын сюзгендиле. Экспертле организацияны проектлери регионлада къалай толтурулгъанларыны юсюнден айтхандыла. Аны эсеплерине  тийишлиликде жангы планла белгиленирикдиле. 

Съездде дагъыда Сабий организацияланы халкъла аралы ассоциациясын айнытыуну юсюнден да сёз баргъанды. Анга 50-ден артыкъ адам къатышханды, ол санда РФ-ни Тыш къыралла бла ишлерини  министерствосуну, Росмолодёжьну, Къазахстанны, Индонезияны, Абхазияны, Къыргъызстанны, Мароккону, Алжирни эм Сербияны келечилери да. Анда аслам эс Ассоциация халкъла аралы жаш тёлю байламлыкъланы игилендириуге себеплик этерге кереклисине бёлюннгенди.

Дагъыда жаш адамланы кёп сейир тюбешиулери болгъандыла. Ол санда белгили спортчула, политикле, жырчыла эм дагъыда башхала бла. 

Эсигизге салайыкъ, бюгюнлюкде «Биринчилени атламлары» биригиуге 11 миллион сабий киредиле. 89 регионда аны 50 минг биринчи бёлюмю жетишимли ишлейдиле. Былтыр ала бардыргъан проектлеге 10 миллиондан артыкъ адам къатышханды.