Уллу Хорламны байрамына хазырланыу тири барады

Уллу Хорламны 80-жыллыгъына хазырланыу, ветеранланы кереклерин жалчытыу, маданият хазнаны объектлерин сакълау, ёсюп келген тёлюню Ата журтха сюймекликге юйретиу: «Единая Россия» «Тарых эсде тутуу» партия проектни баш магъаналы борчларын белгилегенди.

Партия проектни Хорламны музейинде бардырылгъан кенгертилген жыйылыуунда Россейни тарых обществосуну башчысы, «Тарых эсде тутуу» партия проектни жамауат советини таматасы Сергей Нарышкин къыралда Уллу Хорламны 80-жыллыгъына бла Ата журтну къоруулаучусуну жылына аталып, 60-дан аслам уллу проект бардырыллыгъын билдиргенди, ол санда 20-сы маданият объектлени жангыртыу бла байламлыдыла.

Курск эм Белгород областьлада къырал чекни тийресинде, Россейни жангы регионлары Донецк, Луганск Халкъ республикалада бла Запорожье эм Херсон областьлада Киевни неонацистлери бузгъан обектлени жангыртыугъа энчи магъана бурулгъанын чертгенди ол.    

- Бу борчлагъа кенг кёзден къараргъа кереди. Музейлени, килисаланы жангыртыу бла чекленип къалмай, Киевни оноучуларыны аманлыкъларын халкъгъа баям этерге да керекди. Ма бу кюнледе Суджиден къача, ВСУ-ну боевиклери краеведение музейге билип топла атхандыла. Быллай къыйынлыкъланы, сёзсюз, унутургъа жарамайды, - дегенди ол.

Уллу Ата журт урушну ветеранларына къайгъырыулукъ баш борчладан бириди. Аланы социал излемлерин жалчытыугъа энчи эс бурулады. Быйыл партия проектни чеклеринде «Ветераннга саугъа», «Ветеранны юйюню аллында парад», «Георгий бау», «Эсде тутууну свечасы», «Ветераннга сёлеш» акцияла андан ары бардырыллыкъдыла. Дагъыда аскерчилени къабырларын тапландырыу жаны бла битеуроссей субботник да къураллыкъды. «Ол заманда хорлагъанбыз, шёндю да хорларыкъбыз» лекцияла, билим бериу организациялада музейлени арасында «Билирге, эсде тутар ючюн» эришиуле къураллыкъдыла.

Хорламны кюнюне аталгъан къууанчлы жумушланы арасында «Хорламны диктантын» энчи белгилерчады. Быйыл ол 25 апрельде бардырыллыкъды, анга Россейни битеу субъектлери бла бирге тыш къыралла да къошуллукъдула, деп билдиргенди партияны генсоветини секретары Владимир Якушев, Курск областьдан видеоконференция амал бла къошулуп. 

- Диктантха хазырланыу барады, бу жол анга бир заманда да болмагъанча кёп адам къатышырыгъына ышанабыз, - дегенди ол.

Якушев партияны ара толтуруу комитетини стратегия сессиясында регионла кёргюзтген проектлени юслеринден да айтханды. Аладан эм иги сынауланы битеу къыралда тамамларгъа боллугъун чертгенди.

- Беш секцияда бардырылгъанды кенгеш, алагъа къыралны 85 регионундан проектни жамауат советлерини башчылары бла жашауда бардырыугъа жууаплыла къатышхандыла, битеу да бирге 130 адам.  Проектни баш магъаналы бёлюмлери тынгылы сюзюлгендиле, ол санда жан берген жигитлени атларын ёмюрлюк этиу, маданият хазнаны объектлерин сакълау, музейлени даражаларын кётюрюу, жаш адамланы юйретиуде шёндюгю амалланы хайырланыу жаны бла эм башхала, - дегенди ол. 

 Партияны ара толтуруу комитетини башчысы Александр Сидякин «Единая Россия» Россотрудничество эм МИД бла диктант бардырыллыкъ 80 къыралда аланы жазарыкъ жерлени санын кенгертиу жаны бла сёлешиуле бардыргъанын билдиргенди.  «Былтыр кюч ведомстволада 1,5 минг жерде жазылгъанды диктант. Быйыл а къуру МЧС 700 жерни къурагъанды, дагъыда сынау 671 вузда да бардырыллыкъды», - дегенди ол.

Байрамны чеклеринде суратланы кёрмючлери, автопробегле, «Жигитге письмо» акцияла бардырыллыкъдыла. Россейни Почтасы уа жигитлени атларын почта маркалада орнатырыгъы белгиленеди. Партия Россейни аскер-тарых обществосу бла урунуу махтаулукъну шахарларында стелала орнатыу жумушланы сюзеди.

Партия жанлыланы ара советини башчысы, «Хорламны волонтёрларыны» таматасы Ольга Занко Уллу Хорламны 80-жыллыгъына хазырланыу жумушлагъа къатышырыкъ волонтёр корпусха 200 минг адам киргенин билдиргенди. Аланы хазырларгъа партияны келечилери болушадыла.

Жыйылыуда регионла партия проектни жашауда бардырыуда сынауларын кёргюзтгендиле. Сёзге, Камчаткада «Россейни унутулмагъан жигитлери» тарых-жарыкъландырыу проект тамамланады. Ол регионда жигитлени атларын сакълаугъа бурулупду, аланы арасында аскерчилени, тылда уруннганланы, энчи аскер операциягъа къатышханланы. 

 Пензада школ автобусну ичинде Брест къаланы къоруулаучуларына аталгъан музей къуралгъанды. Анда Брест къаланы къоруулаучусу пензачы Андрей Митрофанович Кижеватовну юсюнден шартла да бардыла. Хар кюн да музейни кёрмючю бла 200 школчу бла вузланы студентлери шагъырей боладыла.

Запорожье эм Херсон областьлада, ЛНР-де «Жигитле саудула» проект толтурулады. Анга къатышханла Уллу Ата журт урушха къатышхан жууукъ адамларыны юсюнден роликле алдырадыла, ызы бла ала герои-живы.рф сайтда басмаланадыла. 

Партия проектни КъМР-де жашауда бардырыугъа жууаплы, партияны регион бёлюмюню толтуруучу комитетини башчысы Дмитрий Парафилов да къатышханды стратегия сессиягъа. Ол KABARDIN-BALKAR.ER.RU сайтны журналистлерине билдиргенича, республикада «Хорламны диктанты» 90 жерде бардырыллыкъды.

- Озгъан жылланы сынауу кёргюзтгенича, быйыл проектге къатышханланы саны бек аздан 6 минг адамгъа жетерикди. Бу акциягъа республиканы жамауатында сейир уллу болгъанын айтыргъа сюеме. Къабарты-Малкъар къырал университетде, Къабарты-Малкъар аграр университетде эмда Искусствону Шимал-Кавказ къырал институтунда диктантны жазгъанла бютюнда кёп болуучудула. Акция Европаны эм бийик тауу Элбрусда да къуралады. Диктантха депутатла, республиканы оноучулары, жамауат организацияланы келечилери, студентле да тири къатышадыла, - дегенди Парафилов эмда партия проектни эм «Единая Россияны» халкъ программасыны болушлугъу бла регионда эсгертмелени жангыртыу жумушла толтурулгъанларын чертгенди.