Былтыргъы кырдыкны кюйдюрмегиз

Жай келгени бла кюн жылына башлагъан кезиуде  от тюшюулени саны кёбейеди. Асламында, бу жарсыулу ишле  энчи жашау журтлада, дачалада, бахчачыланы биригиулеринде болуучудула. Ол а  адамла былтырдан къалгъан чапыракъланы, къалгъан-къулгъанланы кюйдюргенлери бла байламлыды.

- От салып, ол ёчюлгюнчю къарап турмасанг, аны тийресинде мекямла къабыныргъа боллукъдула. Бу жарсыулу ишден сакъланыуну жорукълары бардыла. Бек алгъа къургъакъ кырдыкны, къалгъан-къулгъанланы кюйдюрмегиз, отну мекямланы, терк къабыныргъа боллукъ затланы къатында салмагъыз, - деп ангылатхандыла бизге КъМР-де От тюшюуге къажау-къутхарыу службадан.

Андан сора мекямланы араларында эркин жерлеге къурулуш материалланы, оборудованияны, газ бла баллонланы, алача терк кюерге боллукъ затланы  жыяргъа, машинала салыргъа  жарамайды.

Жай кезиуде, кюн къургъакъ болгъан заманда, элледе, бахчачыланы биригиулеринде,   дачалада от салыргъа, печьлени жандырыргъа ахырда жарамайды. Аны сакъламагъанла законлагъа тийишлиликде жууапха тартылыргъа боллукъдула, деп эсгертгендиле бизге от ёчюлтюучюле.

 - От тюшгенин кёрсегиз,   «01» (стационар телефондан), «101» неда «112» (мобильныйден) сёлешип, къутхарыучуланы чакъырыгъыз. От уллу тюйюл эсе, саулугъугъузгъа къоркъуу жокъ эсе, аны ёчюлтюп башларгъа боллукъду, керексиз жигитлик этмей,-дегендиле бизге ведомстводан.