Юй бийчелеге болушлукъгъа

Тюкенледе болгъан быстыр жууучу затланы тюрлю-тюрлюлери асыры кёп болгъандан сейир-тамашагъа къаласа. Быстыр жууучу машинагъа аладан къайсысы тап келиширикди? Жууаргъа тюшген кийимлени тап халда тутар ючюн, бир  порошок тамамлыкъ эталлыкъмыды? Бу соруулагъа жууап товаровед  Бёзюланы Алина бергенди.

-Жууучу порошокла  къурамларына эм борчларына кёре быллайла боладыла:

- къайсы къумачха да жарагъан  жууучу порошокла;

- энчи жууучу порошокла;

- болушлукъчу затла;

- андан ары тазалаучу затла.

Быстыр жуугъанда, жаланда аз кёмюк этен порошокланы хайырланыргъа жарайды.

Былайда чертирге керекбиз: быстырны машина бла жууа туруп, хар порошок да жарап къалмайды.Кийимлени къол бла жуугъанда хайырланылыучу тёрели порошокланы машинагъа къуйсагъыз, бек азындан сиз  кёп тюрлю тапсыз затлагъа жолугъургъа боллукъбуз. Сёз ючюн, иш башланнган кезиуледе полугъузда сапын суулу кёлчюкле боллукъдула. Аны бла бирге уа машинагъыз бузулургъа да къоркъуу чыгъады. Ол себепден а порошокланы сатып ала туруп, орунларында ала къалай хайырланылгъанларыны юсюнден жазыулагъа эс буругъуз - автоматика быстыр жууучу машинагъыз бар эсе уа, бютюнда.

Аллай машинагъа къуюлуучу порошоклада болгъан энчи къурамла сууда артыкъ бек кёмюк этмейдиле, аланы жаланда автомат быстыр жууучу машина бла ишлей туруп хайырланыргъа керекди.

Быстыр жууучу порошоклада, тёреде болгъаныча, быллай къошакъла бардыла:

- быстырны тышында кирни иги кетерген затла (быстыр жууа туруп тири ишлеген субстанцияла);

- байлаучу керекле;

- агъартыучу затла;

- болушлукъчу веществола (сёз ючюн, ариу ийисли къурамла, ферментле).

Битеу жууучу затла порошок неда суусун халыдыла.

Шёндюгюлю жууучу порошоклада бир ненча ПАВ-ла эм сапынны энчи тюрлюлери  бардыла. Байлаучу керекле  сууну жумушакъ этедиле эм машинаны ичинде бла быстырда къуралып жабышыучу къаты затланы (сёз ючюн, кальцийни) кетередиле.

Агъартыучула уа  акъ къумачдан тигилген затланы тышларында тамгъаланы кетередиле. Къызыл чагъырдан, тахта кёгетледен, жемишледен тюшген тамгъаланы ПАВ-ла окисленияны болушлугъу бла жокъ этедиле.

Биопорошокланы юслеринден энчи айтыргъа керекди. Аланы баш борчлары - белокладан (къандан, сютден, жумуртхаладан эм аллай башха затладан) тюшген тамгъаланы кетериудю. Ол тюрлю ишни тынгылы тамамларгъа энзимле  бек иги болушадыла,  ала белокну бек терк бузадыла.

Биопорошокла бла быстырланы температурасы 40-50 градус жылылыгъы болгъан сууда жибитирге эм жууаргъа керекди. Жууа туруп, быстыр жууучу затны орунунда жазылгъан эсгертиуде айтылгъан юйретиулени толтуругъуз. Сиз аны тап хайырланмасагъыз, шёндюгюлю не аламат порошок да быстырны ариу этерик тюйюлдю.

Хар къумачны да  жууучу порошокла бла тюрлю-тюрлю къумачладан (чилледен эм жюнден согъулгъанладан башхаладан) акъ эм башха бетли кийимлени эм жатар жерлени: жастыкъ, жууургъан тышларын, жукъа жабыуларын, кирликлери къаллай даражада болгъанларына да къарамай, къаллай температуралы сууда да жууаргъа жарайды. Аллай порошоклада болгъан акълаучу затла кийимлени ариу этер  ючюн, сууну температурасы 40-дан 60-ха дери градус жылы болургъа керекди.

Къара къумачладан тигилген затланы жуугъанда хайырланылыучу жууучу затлагъа быстырны игирек аяр ючюн, жумушатыучу  керекле къошуладыла. Алада дагъыда бояуну кетмей къалырча этген, къара кийимлени онгдурмагъан фиксаторла да бардыла. Бир-бир жууучу затлагъа бактериялагъа къажау компонентле да къошуладыла. Аллай суусун жууучу затланы иги жанына энчиликлери буду - къара кийимлени ала бла жуугъандан сора алада бирси порошокладан сора кёрюнюучю акъсыл ызлыкъла чыкъмайдыла. Порошокланы бир-бирлеринде сууда эримей къалыучу къошакъла бардыла. Кийим къуруп бошагъандан сора ала быстырны юсюнде ызлыкъла болуп къаладыла.

Жууучу энчи затлагъа уллу терезе жабыуланы   жуугъанда хайырланылыучула да киредиле. Ала да порошок эм суусун халда чыгъарыладыла. Аланы согъулгъан къумачладан тигилген затланы жууа туруп хайырланыргъа керекди. Къуругъандан сора аллай быстырла артыкъ бек угужугула болмайдыла, алагъа итиу ургъан  да тынчды. Аллай жууучу затлагъа химия эм оптика агъартыучу затла къошуладыла.