Тёгерекни тапландырыу эм тазалыкъны сакълау

«Шахарланы шёндюгюлю болумларын къурау»деген программаны чеклеринде бардырылгъан ишлеге озгъан жылда Элбрус районда Тырныаууз шахар къатышханды.

2023 жылда къол кётюрюу бла хорлагъан шахарны Эльбрусский проспектинде администрацияны мекямындан башлап Социал фондха дери жаяу жолгъа тынгылы ремонт этилип бусагъатдагъы дизайннге кёре плитка салыннгандан сора, адамла сюйюп олтурурча шинтикле, жауундан бла къардан къутхаргъан жапмала салыннгандыла.

Мусукаев атлы орамдагъы юйлени арбазларына да тынгылы ремонт этилип, 1800 метрге асфальт салыннганды.

2019 жылда 1 январьдан башлап Элбрус муниципал районну тийресинде кир-кипчикни заманында чыгъарыугъа ООО «Экологистика» жууаплыды.

«Кавказ.РФ» акционер биригиу Азау таладан «Гара-Башиге» дери тёгерекни тизгинине къарайды. Анда тазалыкъ бийик даражада болгъанын энчи белгилеп айтырчады. Кир-кипчикни атаргъа орунла кёп жерледе орнатылыпдыла. Штат халда ишлеген арбаз сыйпаучула да бардыла, ала тёгерекни тизгинине сакъдыла.

Минги тауну тийресинде тизгинни сакълар ючюн, жыл сайын «Таза тау» акция бардырылады. Ол магъаналы болгъанына жыл сайын кеслери, солуучула да шагъатдыла. Ол акцияны «Приэльбрусье» миллет парк, «Кавказ.РФ» акционер биригиу, Элбрус районну бла элни администрацияларыны келечилери биригип бардырадыла. Андан сора да, федерал жолну тёгерегинде субботникле ётедиле.

Районну эллерини администрациялары бла бирге жолланы халларына къаралады. Суу жагъаланы тизгинлери жыйылады. Быйыл Интернетде, социал сетьледе да Тырныауузну тийресинде кир-кипчик заманында чыгъарылмагъаны бла байламлы жамауатны кёп жарсыуларына тюбей тургъанбыз.

Аны бла байламлы жамауатны кир-кипчигин ООО «Экологистика» регионал оператор заманында чыгъаргъаны бла къалгъаны энчи тинтиледи. Районну эм эллени администрациялары бу жумушха уллу эс бурадыла. Заманында чыгъарылмаса уа, ол биригиуге къагъытла жазып, кемчиликлени тюзетирлерин, жамауатны жарсытмазларын излейдиле. Районну, эллени да таматалары адамланы таза эм тизгинли жерледе жашарларын сюедиле.