Жаз башы сабан ишле

Хар замандача,   Терк районну аграрчылары биринчиле болгъандыла. Кюзлюклеге   семиртгичле чачып   бошап, чууакъ кюнлени бошуна жибермей,  эртте чыкъгъан  жазлыкълагъа   урлукъ салып кюрешедиле.

Быйыл анга деп 38 минг гектар бёлюннгенди, деп билдириледи КъМР-ни Эл мюлк министерствосуну пресс-службасындан.

Бюгюнлюкде 120 гектарда картоф эм 1300 гектарда жазлыкъ арпа салгъандыла. Жууукъ заманда жашил къудоруну себип  башларыкъдыла.   Кюзлюклени юсюнден айтханда, районда   анга 10 минг гектар жетеди.
Муниципалитетни эл мюлк управлениясындан билдиргенлерича, сабанлыкълада иги фитосанитар болум сакъланады.  Эл мюлк производительле алгъадан  урлукъ, семиртгич,  ууландыргъан химикатла эм отлукъ къоллу  болгъандыла. Белгилисича, бай эм тынгылы тирлик алыр ючюн,  тийишли жумушланы агротехника  болжалдан  кеч къалмай тамамларгъа борчлуду.

Саулай республикада  жерчиликде уруннганла быйыл  мирзеуден  бла къудору битимледен 3,6 процентге кёбюрек салыргъа муратлары барды.    Алай бла сагъынылгъан битимле  213,4 минг гектарда ёсдюрюллюкдюле, ол санда нартюх 131,6 минг гектарда.  Былтыр бла тенглешдиргенде, ол 2,7 процентге кёпдю.

Эсге сала айтсакъ, былтыр къыйын хауа болумгъа да къарамай, мирзеуден  1,14 миллион тонна чакълы жыйгъандыла, ол санда нартюхден  881,7 минг тонна.