Хазырлыкъны тинтгендиле

Россейни МЧС-ини КъМР-де Баш управлениясы команда-штаб юйрениулени 2-чи кезиуюн ётдюргенди. Ол агъачлада от тюшюуню эм адамла жашагъан жерлени ол отдан сакълауда ведомствону энчи къауумуну хазырлыгъын сынагъандыла. Бу жол анга битеу да 333 адам къатышхандыла эм 78 техника хайырланылгъанды.

Ведомствону пресс-службасыны таматасы Кантемир Беров билдиргеннге кёре, бу жол, таурухха кёре, Нальчикни тийресиндеги  агъач мюлкге от тюшгенди эм ол терк халда элге жууукълаша келеди.  Ары терк окъуна от ёчюлтюучю  къауумла жетгендиле. Ала бла бирге отну аллын тыйыу ишлеге агъач мюлкню ишчилери да къатышхандыла. Жерни къазыу, от ёчюлтюучю насосланы хайырланыу, тереклени кесиу эм къараулну бардыргъанланы белгилеу бу юйрениуледе баш магъананы тутхандыла.

Ведомствону бойсунууунда болгъан от ёчюлтюучюледен сора да, юйрениулеге КъМР-ни Агъач мюлкюню эм Нальчикни агъачларын сакълаучула, республиканы Табийгъат къудуретни эм экология министерствосуну келечилери да къатышхандыла. Дагъыда от элге кёчмезине контроль этген энчи къауум да къуралгъан эди. Битеу кюч бла отха жайылыргъа къоймай. Ызы бла уа аны ёчюлтюу башланнганды.

Юйрениулени экинчи кезиуюне Россейни МЧС-ини КъМР-де Баш управлениясыны таматасыны биринчи орунбасары Эльдар Хашхожев башчылыкъ этгенди. Ол чертгеннге кёре, битеу салыннган борчла тийишлисича толтурулгъандыла.

Эки кюн бардырылгъан юйрениуле республиканы халкъын къыйын болумладан къутхарыу жаны бла болум къаллай даражада болгъанын билир мурат бла ётгенди.