Эм устала бла билимлиле сайланнгандыла

«Профессионалла» деген битеуроссей чемпионатны  регион кесеги бошалгъанды эмда аны  эсеплери чыгъарылгъандыла.

Алгъаракъда билдиргенибизча, тёрт кюнню ичинде  жыйырма бла эки майданда  онюч окъуу учрежденияда  усталыкъ ала тургъан 172 жаш адам  эришгендиле.  Ала право низамны сакълау, мода, школгъа дери билим бериу, электромонтаж, автомобильлеге ремонт этиу,  администрирование, социал жумушла, фармацевтика, медицина эмда графикалы дизайн жаны бла  алгъан билимлерин ишде кёргюзтгендиле.

Конкурсха колледжледе билим алгъанла эмда тамата класслада окъугъанла къатышхандыла. Экспертле-насийхатчылары да аланы дайым да биргелерине эдиле. Усталыкъларына уа   219 эксперт, ол санда предприятияланы, организацияланы келечилери, багъа  бергендиле. 

Алай бла тюрлю-тюрлю бёлюмледе биринчи жерге   Иттийланы Джамболат (веб-технологияла), Мурзаланы Диана (школгъа дери билим бериу), Жашууланы Даниял (медицина эмда социал болушлукъ) – чыкъгъандыла. 

Экинчи сыйлы жерге уа была тийишли кёрюлгендиле: Хубийланы  Илина – кийимлени дизайны, Ботталаны Ясмина – медицина эмда социал болушлукъ, Алтууланы Малика – сетевой эмда системалы администрирование, Чабдарланы Ислам – стоматология эмда ортопедия, Болатланы Артур – къургъакъ къурулуш эмда штукатурка. Ючюнчю жерлени уа была юлешгендиле: Апсуаланы  Амин – бизнесге программалы амалла,  Князланы Валерия – медицина эмда социал болушлукъ, Элеккуланы Ислам – стоматология эмда ортопедия, Мокъаланы Камила – фармацевтика, Мокъаланы Роксана – физкультура эм спорт. 

Биринчи, экинчи эмда ючюнчю жерлеге тийишли болгъанлагъа  сертификатла, саугъала берилгендиле. Преприятияланы келечилери уа  алада ишлерге чакъырыу къагъытла да юлешгендиле.
Эсгертиу: чемпионатны регион кесегин КъМР-ни  Жарыкъландырыу эмда илму министерствосу  къурагъанды. Аны магъанасы  жаш тёлюню билим, усталыкъ да алыргъа кёллендириудю, аланы  хайырланалыргъа болушууду.