Эсепле къууандырадыла

Черек районда «Жылны устазы-2025» Битеуроссей усталыкъ эришиуню муниципал уруму къууанчлы халда жабылгъанды. Аны бла бирге уа эсепле да белгили болгъандыла. Байрам Огъары Малкъарны Абайланы Мисост атлы 2-чи номерли мектебинде озгъанды. Жыйылыугъа районну жер-жерли администрациясыны башчысыны орунбасары  Тареза Эфендиева, билим бериуде  ишлегенлени профсоюзларыны таматасы Батчаланы Анатолий, билим бериу управлениясыны башчысыны къуллугъун толтургъан Уяналаны Мурат, урушну эмда урунууну ветеранларыны, сауутланнган эмда правону сакълагъан кючлерини ветеранларыны организацияларыны таматасы Чеченланы Георгий, башха къонакъла да келгендиле. Ала барысы да устазлагъа жетишимле, илхам учунуулукъ, жангы  бийикликле да тежегендиле.

Эришиуге уа он адам къатышханды. Ала аны хар кезиуюнде да кеслерини сынамларын, хунерлерин да ачыкълагъандыла. Бу жол конкурсда хорлагъаннга Аушигерни физкультурадан  окъутхан устазы Альберт Карданов саналгъанды. Лауреатла  уа Къашхатауну битеулю билим  берген мектебинде башланнган классладан окъутхан Рустамланы Лейла бла Огъары Малкъарны  2-чи номерли школунда физикадан  дерсле берген Джансюйланы Лейла болгъандыла.

Район урумда хорлагъан устаз а энди эришиуню регионда бардырыллыкъ кезиуюне къатышырыкъды.