Даражалы эришиуде хорлагъанды

Озгъан шабат кюн «Пятница» каналда «Домохозяйки против шефов: Битва за вкус» деген бериу  болгъанды. Ол  проект белгили шеф-повар Константин Ивлевни башламчылыгъыды. Анга къатышханланы араларында къыралда аш-суу хазырлау жаны бла халкъыбызны атын айтдыра келген къызыбыз Мокъаланы Гульнара да болгъанды. Проект 4 кезиуге бёлюнюп бардырылгъанды. Аны 4-чю кезиуюнде Гульнара хорлагъанды.

Бериуню Константин Ивлев бла бирге актриса Ольга Картункова бардыргъандыла.

Мокъаланы Гульнара  билдиргенича, бир бёлюмге 5 юй бийче бла 5 повар къатыша эдиле. Барысы да биринчиден жюльен жарашдырыргъа керек эдиле. Андан сора проектни экинчи кезиуюне алтаулан ётгендиле. Бу жол аланы хар бирине да аш-азыкъ четенле берип, ашны аны ичинде болгъан затладан хазырларгъа буюргъандыла.

- Манга батат, морской гребешок, кёгерти (зелень) эм пондзу соус тюшген эдиле. Дагъыда алагъа къошакъгъа энчи тургъан керекли продуктланы да алыргъа эркин эдик. Андан сора финалгъа жаланда экеулен чыгъаргъа боллукъ эдиле – бир юй бийче бла бир повар. Аны себепли бек къайгъыра эдим, – деп эсгереди Гульнара.

Алай бла, конкурсантлагъа   багъа бичгенле жаратхан азыкъланы араларында Гульнараны  бла повар Дмитрий Леташинни ашарыкълары да  бар эдиле.

Ахыр сермешде уа аланы хар бири да 40 минутну ичинде белгилеген азыкъларын хазырларгъа борчлу эдиле. Ол ашарыкъланы атлары жазылгъан къагъытчыкъла уа бёреклени ичлерине салынып эдиле. Дмитрийге бла Гульнарагъа ол бёрекледен къагъытчыкъны тапхынчы  ашаргъа тюшгенди. Биринчи Гульнара тапханды. Белгилегенича, анга бефстроганов жарашдырыргъа тюшгенди. Финалистлени ашарыкъларын Константин Ивлев бла бирге актёр Даниил Вахрушев кёргенди. Гульнараны азыгъын ала бары да бек   татымлыгъа санап, хорламны да анга бергендиле.

Гульнара Константин Ивлевни аты бла чыгъарылгъан адырла бла саугъаланнганды.