Тарыхны, адет-тёрелени да юслеринден баргъанды сёз

Нальчикде  Маданият айныуну арасыны мурдорунда  бу кюнледе «Этноликбез. Къабарты-Малкъар:тарых, маданият, адет-тёреле» деген ат бла  жаш тёлю форум ётгенди.

Аны Нальчикде 1-чи номерли  сабий музыкалы школда юйреннген  жашчыкъла бла къызчыкъла  ачхандыла. Ала регионну миллет энчилигин кёргюзтген жырланы орус, малкъар эмда къабарты тилледе айтхандыла.

Андан сора форумгъа келгенле   «Къабарты-Малкъар:  тарых, маданият эмда  адет-тёреле»,«Къабарты-Малкъар: иги эмда осал жаны», «Кёп миллетлени биригиулери», дагъыда башха темаланы сюзюуге къатышхандыла. Алада жаш адамла адет-тёрелени, миллетлени эмда динлени айырмай къалай жашау этерге боллугъуну, дагъыда алагъа ушаш кёп башха магъаналы затланы юслеринден ушакъ этгендиле, даулашхандыла,  сынауларындан юлгюле келтиргендиле.

Ахырында уа анга къатышханлагъа сертификатла берилгендиле. Эм тири жашла бла къызла уа  КъМР-ни Маданият министерствосуну  эмда  «КъМР-Медиа» къырал учрежденияны саугъаларына тийишли болгъандыла.