Халкъ жырла ёхтемлендире

КъМР-ни маданиятыны сыйлы ишчиси Гузийланы Тахир бла озгъан ёмюрню 90-чы жылларындан бери танышбыз.

Ол орта билим алгъандан сора, Краснодарда маданият институтха окъургъа киреди. Эл клубда да, хар къайдача, жыр-инструментал ансамбль къурауну къолгъа алады. 1980 жылда Ташлы-Таланы Маданият юйюне художестволу оноучу болуп ишге тохтайды. Артда аны  директору да болады,  «Ийнар» ансамбльни да  къурайды.

Биринчи кюнден да Тахирге болушуп тургъан Байсыланы Эльдар болгъанды. Ансамбльни биринчи къауумунда Къаплан Вороков, Занибекланы Мурадин, Гайыланы Артур эм Тахир болгъандыла. Артдаракъдан Къазийланы Хаким, Байсыланы Элияс да къошулгъады. Энди быйыл кюз артында «Ийнар» жыр къауум къуралгъанлы 35 жыл толлукъду.

Бабугентде фестиваль бардырылыучу заманда 22 таулу жыр ансамбль болуучу эди. «Ийнарчыла» республикадан тышында аслам  эришиулеге, фестивальлагъа баргъандыла. Халкъ  жырланы айтып, алчы жерлени алып къайта да  тургъандыла. 2005 жылда «Ийнаргъа» халкъ ансамбль деген атны бергендиле.

– «Жетегейле» деп жангыз бир жырым барды, сёзлерин, макъамын да кесим къурашдырып, – дейди Тахир, башха жырларын ийменип букъдурургъа кюрешип. Алай иги жыр болуп, ол бир айтылып къалса да, халкъны эсинде сакъланады. 

– Эстрада бла кюреширге да  боллукъ эди, алай  халкъ жырла бла кюрешген хазна адам жокъду да, ала бла ишлейбиз асламысында. Ансы эстрада жырлагъа назмулары келишгенле Ёзденланы Евгения, Ахматланы Люба эм Сергей Еремеев бардыла. «Къарачай» газетде ишлеген Ёзденланы Якуб уллу шуёхумду,  аны назмулары да жыргъа болмагъанча тап келишип къаладыла. Эски жырларыбызны тас болмазча эталсакъ, халкъ ыразы болур деп ышанама,-дейди Тахир.