Жолла мардалагъа келиширча

Быйыл "Жашау этерге  инфраструктура" миллет проектге кёре  эм  республиканы жол фондундан бёлюннген ахчагъа Къабарты-Малкъарда 84 километр чакълы бирде  регионал эм жер-жерли  магъаналы жолла мардалагъа келиширча этилликди.   

Алгъадан хазырланнган проектлени эм  этилген келишимлени хайырындан бир-бир объектледе тийишли ишлени былтыр окъуна башларгъа онг табылгъанды.

Ол санда арт жыллада эм уллу объектледен бирине Экинчи Чегем-Булунгу жол саналады. Аны   25 километр чакълы кесегинде тынгылы ремонт ишле барадыла. Былтыр  Черек чучхурладан башлап огъартын   эки машина  ёталмагъан жерледе  жол  жети метрге кенгертилгенди. Кече жарытырча чыракълы  чыпынла салыннгандыла,  жаяу жюрюгенлеге тротуарла, машиналагъа майданла  да жарашдырылгъандыла. Къоркъуусузлукъ жалчытылынырча да бир къауум жумуш тамамланнганды. Бюгюнлюкде подряд организацияны келечилери Булунгу-Эл-Тюбю жолну мурдорун  кючлеп, жауун суу саркъырча быргъыла, арыкъла салып, жардан таш,  топуракъ оюлмазча, черек жагъаларын  суу таламазча бетондан хунала къуюп кюрешедиле. 

  Къышда черекле таркъайгъанда, кёпюрлени чигинжилерин орнатыргъа тап болады. Ол себепден жолчула аланы мурдорларын алгъадан  окъуна жарашдырып башлагъандыла.  Бюгюнлюкде   Чегем бла  Жылгы  суулада  кёпюрле жангыртылгъандыла. Кюн жылыннганлай, алагъа эки къат асфальт салынырыкъды эмда къоркъуусузлукъну жалчытырча  темир буруула да тартыллыкъдыла.

Эсге сала айтсакъ, "Жашау этерге  инфраструктура" деген миллет проектге кёре эм Регион фонддан бёлюннген ахчагъа  Чегем, Кёк-Таш Джууунгу, Абардан, Жылгы, Булунгу суулада 316 метрден асламда  тогъуз кёпюрге тынгылы ремонт этилликди.

 Планнга кёре, Чегем ауузунда жолну толусунлай 2026 жылда бошаргъа   керекдиле.

Андан сора да, Терек сууда Майский - Урожайное жолда узунлугъу 162 метрге жетген кёпюрню къурулушу барады.  Мартны биринчи кюнлеринден башлап специалистле  Ташлы-Тала, Малка, Шитхала, Александровская,  Зарагиж, Псыгансу эллеге баргъан жоллагъа, Прохладный шахарны къаты бла ётген эм  Дейское – Тёбен Курп трассалада  ишлени башлагъандыла. Ол жорукъланы билдирген белгиле салгъандыла, чырмагъан  тереклени  кетергендиле эм башха жумушланы  да толтурадыла.

Дейское элде  да   Шауцуков  орамны мурдорун  жарашдыргъандыла, чыпынлы чыракъла эм бордюрла да  салгъандыла.  
Нальчикде да  Кешоков, Головко-Каменская, Ногмов, Щорс   орамлада  инженер коммуникацияланы тартадыла. Ызы бла жолну мурдорун кючлеп башларыкъдыла. 

Бирси жылладача объектлени кёбюсюн болжалдан алгъа битдирир муратлары барды. Аны бла бирге ишле тынгылы  толтурулурча эм жараулу материалла хайырланырча да  аслам эс бурулады.  

Саулай алып айтханда, сагъынылгъан объектлени  быйылны ахырындан кеч къалмай бошаргъа керекдиле.