Электрон мухурну аманлыкъчыладан сакълауну амаллары

Федерал кадастр палатаны (ФКП) информация къоркъуусузлукъ жаны бла управлениясыны специалистлери электрон мухурну аманлыкъчыланы хаталары тиймезча къалай хайырланыргъа боллугъун ангылатхандыла.

Бюгюнлюкде электрон мухурну (ЭМ) банклада, башха учреждениялада да кенг хайырланадыла, ол кредит организациягъа, инсаннга да жумушларын терк, тынч да тамамларгъа себеплик этеди. Алай ЭМ къурагъан устройство аманлыкъчыны къолуна тюшсе, анга битеу жолла ачыладыла. Аны ючюн магъаналы информация болгъан картагъызны башхалагъа бермегиз, ПИН-кодну жашырынлыкъда тутугъуз. Бу шартла башхалагъа ачыкъ болгъанына ишеклигигиз бар эсе, электрон документлеге ЭМ салмагъыз. Эмда, мычымагъанлай, электрон мухурну берген жеригизден аны жабарын тилегиз.

Эсгертиу: электрон мухурну урларгъа жарамайды, аманлыкъчыла аны бла хайырланыргъа онг берген амалланы излеучюдюле. Ала уа уручуланы къолларына эки тюрлю амал бла тюшедиле. Биринчиси – бир жерде битеу керекли информация жыйылгъан унутулуп къалгъан USB-носительни  (флэшка/токен) юсю бла. Экинчиси – «Элеткрон мухурну юсюнден» законну бузуп, заявительни данныйлерин алгъанда «жумушакълыкъ» этген араланы болушлукълары бла. Алагъа инсан кеси барып кюрешмегенлей, суратланы, паспортну, ИНН-ни, СНИЛС-ни эм башха документлени скан-копияларын ийип къояллыкъды. Аны бла байламлы палатаны башчысыны орунбасары Павел Чащин электрон мухурну быллай амал бла берген аралагъа ышанмазгъа чакъырады. Ол айтханыча, ФКП аккредитованиялары болгъан араланы да контрольда дайым тутады. Адамны идентификациялауну учреждениягъа келгенинден сора эм документлени кеслерин (копияларын угъай) бергининден сора бардырылады.

Дагъыда электрон мухурну болушлугъу бла бир тюрлю жумушну тамамлагъанда контрагент сизни юсюгюзден къаллай информацияны излегенине да эс буругъуз. Сёз ючюн, анга телефон номеригиз да жетерик эсе да, ол пропискагъызны, ИНН-ни неда башха данныйлени сурай эсе, сагъайыгъыз. Сайтлада, приложениялада персональный данныйлени андан ары хайырланыугъа эркинлигигизни тилей эселе, ашыкъмагъыз, ала кёргюзтген положенияланы толусунлай окъугъуз, контрагент аланы башха адамлагъа, жерлеге ётдюрюрге соргъанына бла къалгъанына энчи эс буругъуз. 

Электрон мухур бла юй, жер сатып алгъанда хыйлала ачылгъанындан сора закон къатыландырылгъанды. Бир жанындан ол мюлкню иелерине къоркъууланы азайтады, бирси жанындан а сатыу-алыу рынокну цифровизациясыны бусагъатдагъы амаллары да хаталы болмазына къарайды.