Ырахат жукну бузгъан ышан

Хурулдаудан жаланда адам кеси угъай, аны хатасындан жукълаялмагъан, жууукълары – ахлулары да къыйналадыла. Андан къутулур амалла бармыдыла? Аны юсюнден терапевт  Балаланы Танзиля бла ушакъ этгенбиз. 

-Хурулдауну сылтаулары белгилимидиле?

- Хау, белгилидиле. Хурулдау  адамны солуууна уллу чырмауну хатасындан чыгъады, аны кезиуюнде адамны чархына кереклиси тенгли бир кислород берилмейди. Аны хатасындан а хурулдагъан адамны солууу къысха заманчыкъланы ичлеринде тохтайды – бир ненча секунддан башлап, эки минутха дери. Ол тюрлю ишле уа адамда инсульт, инфаркт, аритмия, гипертония аурууланы чыгъыуларын бир ненча кереге кёбейтедиле, бир-бирледе уа ёлюмге окъуна жетдиредиле – солуу арталлыда тыйылып къалгъаны бла.

Хурулдау – тамакъ-бурун тешикледе тканьны къалтыраууду, хауа кесини жолунда бир тюрлю тыйгъычлагъа жолукъса къуралады. Ол асламысында аууз -тамакъда эт-тери къабыргъала къартайсала, къарыусуз болсала чыгъады.

Спирт  ичгини неда таблеткаланы ичгенден сора да, аууз-тамакъны эти, териси да энишге салынадыла. Адамны солууу аны тамакъ сагъакълары, аденоидлери эм полиплери кёпчюселе, бурун тешикле къынгырлансала да, къыйыннга айланады. Андан сора да, ауурлугъу бек уллу болгъан адам да къыйналады хурулдаудан.

- Андан къутулур амал бармыды? Не зат болушургъа болады?

-Хурулдаудан къутулууну бир ненча амалы барды. Хурулдау тамакъ сагъакъланы уллайыуларыны, бурун тешиклени араларында кемикни къынгыр болуууну хатасындан чыгъа эсе, аланы тапландырыр ючюн, операция этерге керекди. Хурулдауну сылтауу тынгылауукъну энишге салыныууну хатасындан чыгъа эсе, тынгылауукъну багъыуну дарманлары болушургъа боллукъдула.

Тынгылауукъгъа жарау этиуню амаллары да болушадыла хурулдауну кетерирге. Бир-бир адамлагъа, 6-8 килограмм ауурлукъларын кетерселе окъуна, тамамлыкъ этеди. Тынгылауукъну баш жанында этини энишге салыныууну хатасындан чыкъгъан хурулдауну лазер эм радиочастотала криопластика этиу амалны да уллу хайыры болады.

-Лазер бла бийик - вольтлу ток да болушамыдыла?

-Жумушакъ тынгылауукъда лазерни неда бийик вольтлу токну лучлары бла бир аз ёлчемли жарачыкъла саладыла. Ала сау болгъандан сора, аланы жерлеринде къатыракъ эт къозлайды, алай бла да тынгылауукъ  энишге салынмазча къатыракъ болады. Бу процедура амбулаторияда этиледи. Сёзсюз, аны кезиуюнде адам ангинадача ачытыуну  сынайды.

-Криопластикадан а  себеп бармыды?

-Жумушакъ тынгылауукъну хырлы къабыргъаларын эм тынгылауукъда гитче тилчикни суусун азот бла криопластикаторну болушлугъу бла кюйдюредиле. Лазер бла бакъгъандача, бу амалдан сора да тынгылауукъну хырлы къабыргъалары къатыланадыла. Криопластика артыкъ бек ачытмайды, алай къыйматы уа азыракъды. Керек болса, ол багъыу да къайтарылып бардырылады.

-СРАР-терапия уа?

-Бу багъыу хурулдауну ауур тюрлюлеринден къутулууну эм  хайырлы амалыды. Бу тюрлю хурулдауну кезиуюнде адамны солууу кече тохтап-тохтап кёп кере къалады. Аллай саусузгъа  жукълар ючюн энчи маскаланы киерге тюшеди. Ол прибор  компрессоруну болушлугъу бла хурулдагъан адамны солуу органларына хауаны береди, солуу жюрюген тешиклени жабылмай турурча этеди. Бир-бир адамлагъа ол приборну ёмюрден  ахыргъа дери хайырланыргъа тюшерикди.