Гитче эмда орта предприятиялагъа онгла

Былтыр Россейде къырал компанияла гитче эмда орта бизнесден 9,6 триллион сом багъасына товарла эмда жумушла сатып алгъандыла. Буруннгу жыл бла тенглешдиргенде, ол бешден бирине аслам болгъанды. «МСП Корпорацияны» башчысы Александр Исаевич айтханнга кёре, сатыу-алыу этген предприятияланы саны 6,1 процентге кёбейип, 226 мингден атлагъанды. Ол а ала ишлерин бет жарыкълы тамамлагъанларын эмда къырал компанияла алагъа ышаннганларын туура этеди.

Сатыу-алыуда асламысын (73%) производстволагъа тийишли тюрлю-тюрлю продукция алгъанды. Жарашдырыучу производстволары болгъан къырал компанияла да ючден бирине кёп (3,3 триллион сом) продукция алгъандыла гитче эмда орта предприятияладан.

Къабарты-Малкъарда уа былтыр бу кёрюмдю 14,1 миллиард сомгъа жетгенди. Республиканы Экономиканы айнытыу министерствосунда айтханларына кёре, ол буруннгу жылныкъындан 118 процентге артыкъ болгъанды. Бу ишге битеу да 225 предприятие къатышхан эди,  аланы саны да кёбюрек болгъанды.

Министерстводан билдиргенлерича, шёндю гитче эмда орта бизнес бла кюрешгенле къырал компанияла бла узакъ болжаллы келишимле этерге боллукъдула. Бюгюнлюкде республикада аллай оналтысы барды, битеу да 6,6 миллиард сом багъасына. Быйыл а бу программагъа энтта да тогъуз компания къошулургъа умутлуду.