Ахча жыйгъан низамлыкъны, оюмлукъну излейди

Шёндюгю заманда хакъынга хайырлы башчылыкъ этиу, ол санда аны аяулу къоратыугъа юйрениу артыкъда магъаналы болгъаны бла даулашырыкъ адам болмаз.  Бир жанына салалгъан ахча бир уллу муратны толтурургъа болушурукъду. Алай хакъынг артыкъ уллу тюйюл эсе,  ахчаны жыяргъа амал бармыды? Бу къысха статьяда аны юсюнден айтыргъа сюебиз.

Ахчаны бир жанына нек саладыла?

Биринчиден, алай бла финанс къоркъуусузлукъну жалчытыргъа онг барды.  Сунмай тургъанлай къоранчла чыкъсала, ёнкючлеге кирмей, жумушларыгъызны толтураллыкъсыз. Сёзге, техника сынса, медицина жумушланы толтурургъа керек болса, ишден кетерге тюшсе.

Къыстырыкъ болмаса, уллу муратлагъа жетген къыйынды – машина неда фатар сатып алыргъа, бир жерге барып солургъа, алача башхала. Дагъыда бир жанына салыннган сомланы хайырындан кредитлеге кирмей, керек болгъан затланы сатып алыргъа онг боллукъду.

Пенсияны юсюнден а шёндюден сагъыш этерге керекди. Уллайгъандан сора да жукъну да тюрлендирирмей, юйреннгенча жашаргъа сюе эсегиз, бир жанына салгъан капекле керек боллукъдула.

  Къалай жыяргъа боллукъду

Ахчаны жыйыуну бир ненча жоругъу барды. Биринчиси -   50/30/20 амал. Ол кенг жайылыпды дерчады. Алай бла алгъан хакъны ючге юлеширге керекди. Аны жартысы аш-суу, жашау журт-коммунал тёлеуле дегенча жумушлагъа къоратылады. 30 процентине уа жюрегинг сюйген затла сатып алыргъа эркинсе.  Къалгъан 20 проценти – инвестицияла эм бир жанына салынырыкъ ахчады.

Экинчи амал артыкъда хайырлы болгъанын айтадыла финансла жаны бла экспертле. Айлыкъны жоярдан алгъа аны бир кесегин банкда счётха ётдюрюп къояргъа боллукъду.  Энтта бир жорукъ, айлыкъны къолгъа алгъанлай,   къыстырыкъ сомланы бир жанына салып къояргъа керекди, къалгъан къоранчла андан сора этиледиле.

Хакъ аз эсе да, муратларыгъызны толтурургъа жыргъа боллукъду, сёзге, ахчаны 5 процентин окъуна  бир жанына салып. Аны хар айдан да этсегиз, юйренчек болуп, муратыгъызгъа жеталлыкъсыз.

Къоратыргъа сюе эсем а?

Хау, къолгъа капек тюшгенлей, аны терк окъуна жоюп къояргъа ёчбюз. Орамлада, тюкенледе, Интернетде, телевиденияда реклама да сукъландыргъанлай турады тюрлю-тюрлю ариу затчыкъла бла. Болсада къаты болуп, салгъан муратынга барыргъа керекди. Дагъыда бир жукъ сатып алырдан алгъа, ол манга керти да керекмиди, неда кесими шёндю ыразы этер ючюнмю алама, деген соруугъа жууап излегиз. Алай бла оюмсуз къоранчладан сакъланаллыкъсыз.

Ахыргъы болумла

Алай бла бир жанына салгъан ахча теркирек ёсер ючюн, аяулу болургъа керекди. Хар айдан файдаланы бла къоранчланы тергеп, керексиз жоюуладан сакъланыргъа боллукъду. Дагъыда экспертле финансланы тизмесин къураргъа неда телефонда ол жаны бла приложенияланы хайырланыргъа жарагъанын айтадыла.  Тюкенледе акцияла бардырылгъан кезиулени сакълагъыз, ол айып тюйюлдю.

Бирде кесинге угъай дей билген хайырлыды. Энтта бир жыйрыкъ, кёлек, жангы сумка   сатып алыргъа ашыкъмагъыз. Бир-эки кюнню сагъыш этигиз, бу заман товар керек болгъанын бла къалгъанын кёргюзтюрюкдю. Ишде неда  сунмай бирле ахча саугъа этселе, аны да бир жанына салып къоюгъуз.

 Ахча жыйгъан къыйын ишди. Ол низамлыкъны, оюмлукъну излейди. Бюджетни тюз юлеширге, муратла салып, аланы толтурургъа, къоранчланы сюзерге юйренсегиз,  финанс жаны бла жетишимли боллукъсуз.