Болушлукъ хакъсызды

«Ата журтну къоруулаучулары» фондну регион бёлюмюнде энчи аскер операциягъа къатышханлагъа, СВО-ну ветеранларына эм аланы юйюрлерине хакъсыз юридический болушлукъ бериледи.

- Себеплик тюрлю-тюрлюдю, ол санда законла ангылатыладыла, аны бла бирге заявленияланы, тилеклени, тарыгъыуланы, башха праволу документлени  жазаргъа болушабыз. Андан сора да,  сюд органлагъа дауну жарашдырыргъа, власть органланы ишлери бла байламлы тилеклени хазырларгъа себеплик этиледи,-деп ангылатхандыла фондну пресс-службасындан.

Бюгюнлюкде уа фонд республиканы прокуратурасы, Аскер прокуратура, РФ-ни Следствие комитетини регионда управлениясы, Къырал юридический бюро, Нотариусланы палатасы, Ёкюллени палатасы, Адамны эркинликлери жаны бла уполномоченный бла келишимле къабыл кёрюлгендиле. Аланы хайырындан ветеранлагъа дайым да юридический болушлукъ бериледи, ол  хакъсызды. Дагъыда бу органланы къуллукъчулары приёмла да бардырадыла. «Фондха берилген 3546 тилеклени асламы (3476) юридический соруула бла байламлыдыла, аланы 98 проценти тамамланнганды»,-дегендиле фондну пресс-службасындан.

Бу жаны бла себепликни алыр ючюн а, ветеранны биргесине документлери болургъа керекди, ол санда паспорту, ветеранны удостоверениясы, медико-социал экспертизаны справкасы.   Юристни болушлугъун керек болса, ветеран аны ишлерине къараргъа жууаплы  социал координаторгъа билдирирге боллукъду.   

«Ата журтну къоруулаучулары» фонд Нальчикде, Къабарты орамда, 160-чы мекямда орналыпды. Ол баш кюнден байрым кюннге дери эрттенликде 9 сагъатдан ингирде 18 сагъатха дери ишлейди.