Мандаринле Абхазияда кеси алларына ёсмегендиле

Аланы ары  ярославльчи сатыу-алыу этген  бир бай киши келтиргенди.

  Х1Х ёмюрде алтын бла кюрешген эмда  Ярославльде уллу  къумач чыгъаргъан заводлары болгъан  Игумновланы юйюрлери не заманда да ачлыкъ, жаланнгачлыкъ сынамай жашагъанды. Битеу юйюрню ырысхысы уа жангыз жашлары Николайгъа къалгъанды. Алай  бла ол чирик бай болгъанды. Не зат  сюйсе да, аны алыргъа, этерге къолундан келе эди. ХХ ёмюрню  башында ол Москвада  Ярославльден архитектор Поздеевни  проектине кёре кесине   орус маталлы уллу юй ишлетеди. Жангы юйге къурманлыкъ этгенинде уа, чакъыргъан  къонакъларын  не бла сейирсиндирейим деген акъыл башын бийлейди. Ол заманда  бай тепсеу залны полуна алтын сомланы жаярларын буюрады. Къонакъладан къайсы эсе да,  Игумнов полуна патчахны сураты бла  алтын ахчаланы  тёгюп, аланы уа келген  къонакъла аякълары бла малтагъанларын императоргъа жетдиреди. Андан сора къырал башчы Игумновну   узакъгъа – Абхазиягъа - артыкъ уллу болмагъан тыгъырыкъ элчикге ашырады. Сёзсюз, ол заманда Абхазия курорт жер тюйюл эди.

Не айтыр кереклиси барды, бир башха адам анда эрикгенден къолларын да бошлап, ичгичи да болур эди. Болсада  Игумновну тауусулмагъан  тирилиги жипили жерлени хар зат да чакъгъан тийреге айландыртады. Бек алгъа ол тенгиз боюнунда чабакъ тутуу ишни къурайды эмда чабакъ жарашдыргъан консерва завод ишлейди, андан сора ярославльли  къумалы ийнекле келтирип, малчылыкъ бла кюрешип башлайды, алай аны жашаууунда бек сюйген эмда жаратхан иши терек бахчачылыкъ эди. Игумнов Кубаньдан  баржала бла  къара топуракъны келтиртеди эмда  ол тийреледе  анга дери бир заманда да ёсдюрюлмеген тереклени урлукъларын эмда зыгытларын жерге салып башлайды. Алай бла анда  киви, манго, бамбук да ёсдюреди. Болсада  Абхазияны  жеринде неден да   Къытайны императоруну бахчаларында ёсген  гитче къызгъылдым тирликлери болгъан терекле бютюн иги айныйдыла. Ол терекле мандаринле эдиле. Ол атны Къытайда уллу къуллугъу болгъан адам жюрютгенди.

Революциядан сора  Игумнов юйюрюн тыш къыралгъа  ашырады, алай  кеси уа жюреги жаратхан, сюйген ишин а къоюп кеталмайды. Ол Абхазияда къалады, жашаууну ахыр кюнюне дери  аны иелигинден къыралгъа сыйырылгъан мюлкде  къара ишлени тамамлагъан агроном болуп ишлеп тургъанды.

Алайды да,  мандаринни къолгъа алып, къабугъун тазалап башлагъанлай, ярославльли бай Николай Игумновну эсге тюшюре туругъуз. Ол анга этилген хурмет боллукъду.