Хорламны юсюнден – медикледен сахна оюнла

Республиканы Саулукъ сакълау министерствосуну башламчылыгъы бла юч жюзден аслам медик эм аланы сабийлери Уллу Хорламгъа аталгъан «Бизни хорламыбыз» деген чыгъармачылыкъ эришиуге къатышхандыла.

Эришиу тёрт кесекден къуралгъанды: эм ариу сурат, уруш жырны жырлау, назмуланы окъуу эмда урушну юсюнден сахна оюн. Аллергияланы бакъгъан ара «Двеннадцать мгновений весны» фильмден Исаев юйдегиси бла тюбешген юзюкню сайлагъанды. Кинодача, ала да юзюкню къара-акъ тюрсюнле кёргюзтгендиле, сёзле айтылмайдыла, сезимлени, сагъышланы къарагъанлары, бетлери, тепгенлери бла билдиредиле. «Вячеслав Тихоновну оюнун кёргюзтгенде умутубуз Кобзонну ауазы бла Роберт Рождественскийни ёмюрлюк жырны эшитдирирге эди. Алай оюннга дагъыда къарагъанымда Таривердиевни макъамы тамам болгъаныма тюшюннгенме», -  дейди араны жамауат бла байламлыкъла жюрютюу жаны бла бёлюмюню келечиси Елена Елоева. Тёреде бола келгенича, врачла саулукъну да унутмагъандыла, тютюн ичиу адамны чархына къалай хаталы болгъанын ачыкъларгъа кюрешгендиле. 

Онкология диспансер а оюнун тиширыула урушну кезиуюнде кёргюзтген жигитликни кёргюзтюуге атагъанды. Анда ала не ауур ишден да къачмагъанларыны, жюреклерини, ниетлерини тазалыгъыны юсюнден а аскерчи жаш хапарлайды. Онкология эм онкоурология бёлюмню башчысы Кантемир Канукоев эсгертгенича, уруш жыллада тиширыула эр кишиле бла тенг уруннгандыла, тасхачыла болгъандыла, жаралы болгъанланы бакъгъандыла. Муратыбыз Хорламны жууукълашдырыугъа тиширыула къаллай къыйын салгъанларын ачыкъларгъа эди, деп къошханды ол. Фильмлерин онкологла Сармаковода алдыргъандыла, кийимлени, башха керек затланы кеслери жыйышдыргъандыла, операторла, режиссёрла да кеслери болгъандыла.

Бу эришиуге къатыша, медикле фахмуну чеги болмагъанын кёргюзтгендиле. Алай бла ала Уллу Ата журт урушну тарыхын сакълаугъа кеслерини къошумчулукъларын да этгендиле.