Хорламны магъанасын ачыкълай

Хорламны поезди Нальчикде болгъанды, дунияда биринчи кере къуралгъан интерактив кёрмюч ара шахарыбызда эки кюнню ишлегенди. Анга къараргъа аслам инсан – къуллукъчула, абаданла, сабийле, жаш адамла да – жыйылгъандыла.

Уллу Ата журт урушха аталгъан быллай биринчи кёрмючге къараргъа хар кимге да сейир эди. Поездни он вагонунда тюз да къазауатланы кеслериндеча  кёргюзтюлген затла кертиликлери бла тамашагъа къалдыргъандыла. Элли видеопроектор, онсегиз видеокъабыргъа бла онеки тач-стол – алада хауа, суулада да сермешле, танк къазауатла, чабыуулла, аскерчилени харкюнл     юк жашаулары, эсгериулери суратланадыла. Кёрмюч суратла, таууш бла да баргъаны себепли уа, кесинги уруш аулакъгъа тюшген да сунаса. Аскерчилени кёзлерине къарай, ала сынагъан сезимлени, жараларыны ачылыгъына тюшюнесе.

Къараргъа келгенлеге уа волонтёрла болушхандыла, наушникле юлешгендиле. Ала бла уа Хорлам ючюн къаллай багъа берилгенини, Гомельден Москвагъа, Сталинграддан Берлиннге дери жолланы юсюнден айтылады. Кёрмючге келген хар инсан аскерчиле бла бирге уруш аулакъладан ёте, мамыр жашауну татыуун толу ангыларыкъды. Аны бла байламлы Шимал-Кавказ ислам университетни устазы Геграланы Аким бу кёрмючге къарау бютюнда жаш адамлагъа магъаналы болгъанын белгилейди. Алай бла ала ата-бабаларыбызны жигитликлери, журтубузну тарыхы бла ёхтемленирге юйренедиле.