Усталыкъларын кёргюзтгендиле, иш да тапхандыла

Тюрлю-тюрлю жерледе уруннган адамланы билимлерин бла сынамларын ёсдюрюр муратда ишде усталыкъны ёсдюрюу жаны бла эришиу бардырылгъанды.

Эришиуню бардырыугъа усталыкъны ёсдюрюу ара жууаплыды. Жарыкъландырыу эм илму министерствону усталыкъ билим бериу жаны бла бёлюмюню башчысы Марьяна Абазова билдиргеннге кёре, быллай майданла республиканы битеу колледжлеринде, ол санда энчи иели учреждениялада да къуралгъандыла. Быйыл сынаулагъа жюзден аслам жаш адам къатышхандыла. Быллай жерледе жаш адамла сайлагъан усталыкъларына кёре сынам жыядыла, айныйдыла.

Аллай майданладан бири Гуманитар-техника колледжде къуралгъанды, мында эришиу эм кёп изленнген усталыкълагъа кёре алты жаны бла бардырылады – айти, веб-технологияла, социал жалчытыу, право низамны сакълау, физкультура, фитнес эм спорт, саулукъ сакълау, кеслери аллына учхан аппаратла бла ишлеу. Анга къатышханла компьютерлеге программала жарашдырадыла, тюрлю-тюрлю турмуш болумлада адамлагъа болушургъа юйренедиле, ачыгъанны саулугъуна къарайдыла, дронланы учдурадыла, криминалистиканы энчиликлерине тюшюнедиле. Аланы усталыкъларына къараргъа уа иш бла жалчытхан организацияланы келечилери жыйылгъандыла. Араны башчысы Мадина Маржохова айтханнга кёре, конкурсну эсеплерине кёре жаш адамланы ишге алыргъа да боллукъдула. Иш бла жалчытханла аланы усталыкъларына, фахмуларына, терк эм тюз оноу эте билгенлерине къарарыкъдыла.

Хорлагъанла уа кеслерин артда эришиуню регионла аралы кезиуюнде сынарыкъдыла.