Ата журтха сюймекликни китап окъуу бла кючлей

«Китапханалада – жаш тёлюню Ата журтха сюймекликде юйретиу» деген темагъа Мальбахов атлы миллет китапхананы башламчылыгъы бла жазыучуланы, басма юйлени келечилерини къатышыулары бла жыйылыу къуралгъанды.

Республиканы шахарларыны бла эллерини китапханаларыны ишчилери кётюрюлген соруугъа кёре оюмларын билдиргендиле. Юлгюге, Мечиланы Кязимни атын жюрютген китапханадан Ирина Подгорная айтханыча, жаш адамланы тюз жолгъа салыуда, аланы ариу ниетлеге юйретиуде аланы баш онглары – китапды. «Интернет бизге тюрлю-тюрлю амалла бла жаш тёлюге китап окъургъа жол ачаргъа болушады. Ата журтха сюймекликни инсанны жюрегине гитчеликден – юйюрде, мектепде, китапханада - сингдирирге керекди», - дейди ол. Бюгюнлюкде китапханалада ол муратланы толтурургъа хар не да барды, ата журтлу, битеу дуниягъа да белгили жазыучуланы чыгъармалары уа анга себепдиле. Миллет китапхананы башчысы Анатолий Емузов да бюгюнлюкде китапла энчи жерни алгъанларын белгилегенди. Аланы окъуу тарыхыбызгъа хурмет этерге, маданиятыбызны, адет-тёрелени, туугъан жерни багъаларгъа юйретеди, дегенди ол.

Конференциягъа келгенлени барысына да артда ишлеринде хайырланырча саугъагъа тарых, краеведение китапла берилгендиле.