Белгиленнген муратларыбызны толтургъанбыз

Озгъан жыл ноябрь айда «Новапорт Холдингни» таматалары бла тюбешгенимде, Нальчик халкъла аралы аэропортну айнытыу жаны бла сорууланы сюзген эдик, ол санда аны айнытыу инфраструктурасын, деп жазгъанды КъМР-ни Башчысы Казбек Коков кесини телеграм-каналында.

«Бюгюнлюкге ол белгиленнген муратларыбызны асламысын толтургъанбыз дерге боллукъду. Адамланы жумушларын жалчытхан жерни жангыртханбыз, дагъыда жумушланы тамамлагъан жангы терминал ачылгъанды. Самолётлагъа минерге эм солургъа деп излемлеге келишген жерле къуралгъандыла.

 Нальчик аэропортда ишчи тюбешиулени бардырыргъа эм келишимлени этерге деп конференц-зал, башха отоула да къуралгъандыла. Ол амалла турист онгла эм бизнесни башха бёлюмлерин айнытыргъа, билим бериуде, спортда эм маданиятда байламлыкъланы жюрютюрге себеплик этерикди.

Андан сора да, рейсге тюшер ючюн, къагъытланы жарашдыргъан эм багажны берген да тынч болгъанды. Бек башы уа - аэропортну ишин жалчытхан жангы энчи техника алыннганды.

Эсигизге салайым, алгъын аэропортну тыш кёрюмдюсю жангыртылынып, аны тёгереги да тапландырылгъан эди», - деп айтылады билдириуде.