Мирзеуню, урлукъну да таплыгъына кёз-къулакъ болгъанла

Россельхозараны Къабарты-Малкъарда бёлюмюнде алгъаракъда бардырылгъан кенгешде бу ведомствону былтыргъы ишини эсеплерини юсюнден сёлешгендиле эмда быйылгъа борчларын да белгилегендиле. Жыйылыугъа республиканы эл мюлк министрини орунбасары Мачраил Шетов, «Россейни таянчагъы» битеуроссей жамауат биригиуню регионда бёлюмюню башчысы Альберт Кильчуков эм башхала къатышхан эдиле.

Ал сёзюнде эл мюлк министрни орунбасары, аш-азыкъла жаны бла къоркъуусузлукъну жалчытыуда, миллет проектле бла белгиленнген технологиялы башламчылыкъланы тамамлауда Россельхозара бардыргъан ишни магъанасы уллу болгъанын чертгенди. «Бу ведомствода уруннганланы усталыкъларыны хайырындан бизни республикада мирзеуню эмда андан жарашдырылгъан продукцияланы таплыгъына эмда къоркъуусузлугъуна багъа бериу иш тынгылы бардырылады, эл мюлкде экология эмда биология жанлары бла ахшы тюрлениуле эсленедиле», - дегенди Мачраил Шетов.

Сагъынылгъан араны башчысы Хасанби Куржиев былтыргъы эсеплени туура этгенде, эл мюлк товарла чыгъарыучулагъа битимчилик жаны бла, ол санда урлукъчулукъда эмда битимлени къоруулагъан препаратла бла жалчытыуда, Россельхозара аслам жумуш бергенин билдиргенди. Бёлюм 117 минг тоннадан артыкъ урлукъну таплыгъын тинтгенди, дагъыда онжети минг гектар сабанлагъа кёз-къулакъ болгъанды.

Ведомствону башчысы билдиргеннге кёре, былтыр жазлыкъланы 9,8 минг тонна урлугъу себилгенди республикада. Кесибизде жарашдырылгъан сортларын эмда гибридлерин араны лабораториясында тинтип, къырал излемлеге келишгенлерин тохташдыргъандыла. Мюлкледе хайырланылгъан урлукъланы 82 проценти Россейде чыгъарылгъандыла, къалгъан кесеги уа тыш къыралладан келтирилгенди. Дагъыда кюзлюклени урлукъларындан 14,6 минг тонна керек эди да, аладан артыгъы (56 минг тонна) бла къыстырыкъ этилгенди.

Араны специалистлери 315 мингден артыкъ гектар сабанлада фитосанитария тинтиуле бардыргъандыла, 9,3 минг тонна урлукъ уа фитоэкспертиза этгендиле. Бу ишлени кезиуюнде карантин тизмелеге кирген заранлы къурт-къумурсхалагъа бегирекда эс бургъандыла. Саулай алып айтханда, 2024 жылда бу ведомство 138 мюлк бла байламлыкъ жюрютгенди. Ол а буруннгу жылдан ючден бирине кёп болгъанды. Аны хайырындан жазлыкъланы эмда кюзлюклени урлукъларын себиу чурумсуз ётгенди.

Озгъан жылда араны келечилери минг бла жарым гектар сабанлада битген, кеслери да урлукъгъа жараулу болгъан нартюхню, чёплеуню, кюзлюк будайны эмда арпаны тинтип чыкъгъандыла. Инспекция органлагъа пробала алырча жарым жюз заявка берилгенди.

Бёлюмню башчысы быйылгъа белгиленнген борчланы юсюнден да сагъыннганды. Ол санда мюлкле эмда къырал власть органла бла бирге ишлеуню, берилген жумушланы санын эмда качествосун игилендириуню, жангы технологияланы эмда стандартланы сингдириуню эм башына салгъанды.

Кенгешге къатышхан бирсиле да урлукъчулукъ, фитосанитария мониторинг, битимлени къоруулау, органика производствону къурау жаны бла ара салгъан къыйын уллу болгъанын чертгендиле. Ызы бла эм иги уруннган специалистлени саугъалагъандыла.