Устазла хунерлерин ачыкълайдыла

Биринчи номерли гимназияны мурдорунда «Нальчикде жылны устазы – 2025» усталыкъ эришиу къууанчлы халда  ачылгъанды. Быйыл анга 36 адам къатышырыкъды эмда ала кеслерини хунерлерин алты тюрлю бёлюмде – «Мектепни эм ахшы устазы», «Ана тилни бла маданиятны эм ахшы устазы», «Ахшы педагог - насийхатчы», «Ахшы жаш устаз», «Ахшы педагог – психолог», «Къошакъ билим бериуню эм ахшы устазы» - ачыкъларыкъдыла.

Конкурсну ачылыуу бла жыйылгъанланы педагог ишни ветераны, педагогика илмуланы доктору Байчеккуланы Нина алгъышлагъанды. Ол бу эришиу жылдан-жылгъа тёрели бола бара, шахарны устазларына билимлерин ёсдюрюрге, хунерлерин айнытыргъа ахшы амалгъа бурулгъанын да чертгенди. Россей арт кезиуде кесини билим бериу бла байламлы ал борчларындан бирине окъутуулары эм качестволу болгъан он къыралны тизмесине къошулууну санап келгенин эмда ол муратыбыз озгъан жылда жетишимли толгъанын да эсгертгенди. Аны бла бирге Россей халкъла аралы олимпиадала бла беш эм кючлю къыралны санына да къошулгъаны - ол устазланы къыйыны болгъанын белгилегенди эмда эришиуге къатышырыкълагъа жетишим тежегенди.

Нальчик ахар администрацияны Билим бериу департаментини башчысы Алим Мальбахов бла билим бериуде бла илмуда ишлегенлени профсоюзларыны жамауат организацияларыны таматасы Татьяна Вологирова да   къошулгъандыла алгъышлагъа. Ала бу конкурс эришиу халда бардырылгъанлыкъгъа, битеу да жаш тёлюню окъутуу эмда юйретиу системаланы бирге жыйышдыргъанын, анга къатышханла эмда ала уруннган мектеплени келечилерин къауумлада ишлерге тюшюндюрюуге ахшы амал болгъанын белгилегендиле.

Къайсы эришиу да – ол эм алгъа сынам, жангы затха тюшюнюу, юйрениу болгъанын чертип, анга къатышыргъа таукелленнгенлеге эмда ала ишлеген школланы таматаларына ыразылыкъларын билдиргендиле. Конкурсдан сора ала усталыкъ хунер жаны бла сынамларын байыкъландырлыкъларын, алай бла уа хар заманда да жетишимли болургъа атлам этгенлерини юсюнден айтхандыла.
 
Эришиуню кезиулери юч майданнга юлешинип – 1-чи номерли гимназия, 13-чю номерли гимназия, 32-чи номерли мектеп – бардырыллыкъдыла. Анда алчыланы, айырмалыланы да атларын 21 мартда, конкурсну байрам халда  жабылыуунда, белгили этерикдиле.

Эришиуню ачылыуу бла жыйылгъанланы къонакъбай мектепни окъуучулары да алгъышлагъандыла. Ала устазлагъа  жыргъа, тепсеуге хунерлерин кёргюзтюп, кёллерин кётюргендиле.

«Ана тилни бла адабиятны эм ахшы устазы» бёлюмге алтаулан къатышадыла. Аладан ючюсю таулуладыла – Нальчикни 18-чи номерли мектебинден Хазналаны Марина, 13-чю гимназиясындан Созайланы Фазилят, 23-чю школундан Балаланы Эльмира.

Ала, айтханыбызча, 1-чи гимназияда къуралгъан майданда кёргюзтедиле кеслерини хунерлерин. Биринчи урумда  хар бири жюрини келечилерине дерсде сабийлени ана тилде юйретиуде, аланы анга сюймекликлерин къозгъауда  хайырланнган амалларыны юслеринден хапарлагъандыла. Экинчисинде уа ала танымагъан сабийлерине ачыкъ дерсле берирге керек боллукъдула. Ахыр кезиуюнде уа соруулагъа жууапла берликдиле.

Белгилегенибизча, алыкъа бу конкурс аны шахар даражалы бёлюмюдю. Мында алчылыкъны алгъанла уа эришиуню республикалы кесегине къатышырыкъдыла. Анда да хорлагъанла уа къырал даражалы ахыр урумуна барлыкъдыла.

Конкурсну низамына тийишлиликде быйыл аны «Ана тилни бла адабиятны эм ахшы устазы» бёлюмю Бурятия Республикада къураллыкъды. Нек дегенде озгъан жылда биринчи жерни аланы келечилери алгъан эди. Бу жол да анга бизни региондан тийишли устаз къатышыр деген ышаныулукъда, хунерлерин ачыкълагъанлагъа жетишим тежейбиз.