Акъыллы сабан: цифралы амалла эл мюлкде

РАН-ны Къабарты-Малкъарда илму арасыны алимлери «Акъыллы сабан» деген жангы амал къурагъанды. Айтханларына кёре, ол эллилеге нартюх ёсдюрюрге себеплик этерик затды, кеси да сабанланы тинтгенде эмда болгъан кемчиликлени ачыкълагъанда шёндюгю цифралы амалланы хайырланады.

Аны магъанасы неди: ол спутникле, сора кеслери алларына учхан аппаратла тюшюрген суратлагъа къарап, хар сабанны энчилигин жик жиги бла кёреди. Ол санда битимле на халда болгъанларын, къалай ёсгенлерин, алагъа керек минералла эмда азот топуракъла жетишгенин да тохташдырады. Ызы бла битеу жыйгъан информацияны энчи программагъа кёчюрюп, сабанны 3D маталлы суратын жарашдырады. Аны кёрген элчи уа ол жерни къалайына неллай бир семиртгич неда дарман салыргъа кереклисин кёреди эмда аллай затланы аяулу хайырланады. Аны себепли табийгъатха да азыракъ заран тюшеди.

Системаны санында DJI Mavic 3M эм DJI Agras Т10/Т40 дронла да бардыла. Ала къуру тинтиуле этиу бла къалмай, нартюххе дарман, башха затла да жаяргъа боллукъдула, аны бла эл мюлкге бек иги себеплик этерикдиле, дегенди проектни башчысы Владислав Шуганов.

Алимле жарашдыргъан системагъа тийишли багъа берилгенди. «Акъыллы сабанны» къуру бизде угъай, тышында да кёп жерледе женгил хайырланыргъа боллукъду.