Заводха экскурсия

Терк районну билим бериу департаменти, «Терекалмаз» бла бирге, школчулагъа бу заводха экскурсия къурап, аланы анда болгъан онгла эмда инженер-техника усталыкъла бла шагъырейлендиргендиле.

Биринчиден жаш къонакълагъа презентация бардыргъандыла. Аны кезиуюнде алагъа экспертле налмасдан инструментле къалай этилгенини юсюнден хапарлагъандыла. Ызы бла школчула производствогъа къарагъандыла, оборудование къалай ишлегенин кеслери кёзлери бла кёргендиле, анда къаллай технологияла хайырланылгъанын да билгендиле.

Школчуланы дагъыда заводну музейине чакъыргъандыла. Анда алагъа «Терекалмаз» къачан къуралгъаныны, аны тарыхыны, предприятияны айныууна къыйын салгъан адамланы юслеринден кёп сейир зат айтхандыла.

Бу экскурсияны магъанасы ёсе келген тёлюню инженер усталыкъла бла толуракъ шагъырейлендириудю. Аны къурагъанла сабийлени бийик технологиялагъа сейирлери болса сюе эдиле.